އިދިކޮޅު އެމްޑީޕީގެ ޗެއާޕާސަން ހޮވުމަށް ބާއްވާ އިންތިހާބުގެ ވޯޓުލުން ފަށައިގެން ކުރިއަށް އެބަދެއެވެ.
މި އިންތިހާބުގައި ވާދަކުރައްވަނީ ކުރީގެ ރައީސް މުހައްމަދު ނަޝީދާއި ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއީލް އަހްމަދު ނަސީމެވެ.
މުޅި ރާއްޖޭގައި ކުރިއަށްދާ މި އިންތިޚާބުގެ ވޯޓުލުން މިއަދު މެންދުރުފަހު 14:30 ގައި ފަށާފައިވާއިރު، ވީހާ ވެސް ގިނަ މެންބަރުންނަށް ވޯޓުލުމުގެ ފުރުސަތު ފަހިކޮށްދިނުމުގެ ގޮތުން ވޯޓުފޮށިތައް ބަންދުކުރާނެ ވަގުތު މިހާރު ވަނީ ރޭގަނޑު 20:30 އަށް އިތުރުކޮށްފަ އެވެ. މި އިންތިހާބުގައި ވޯޓުލުމުގެ ހައްގު ލިބިގެންވަނީ މި އަހަރުގެ އޭޕްރީލް މަހުގެ 22 ވަނަ ދުވަހުގެ ނިޔަލަށް އެ ޕާޓީގެ ދަފުތަރުގައި ރަޖިސްޓަރީވެފައިވާ މެންބަރުންނަށެވެ.
މި އިންތިޚާބަކީ ސިޔާސީ ގޮތުން އެމްޑީޕީއަށް ނުހަނު މުހިންމު އިންތިޚާބަކަށް ވާއިރު، މިއީ ރައީސް ނަޝީދު ‘ދަ ޑިމޮކްރެޓްސް’ އުފެއްދެވުމަށް ފަހު އަލުން އެމްޑީޕީއާ ގުޅިވަޑައިގެން ކުރިމަތިލައްވާ ފުރަތަމަ ބޮޑު އިންތިޚާބެވެ. އިންތިޚާބުގައި މީކާއިލް ނުކުމެވަޑައިގެން ހުންނެވީ ކުރީގެ ރައީސް އިބްރާހީމް މުހައްމަދު ސޯލިހުގެ ތާއީދާއެކުއެވެ. ކުރީގެ ޗެއާޕާސަން ފައްޔާޒް އިސްމާއީލް ތާއީދު ކުރައްވަނީ ނަޝީދަށެވެ.
ފާއިތުވި ދުވަސްތަކުގައި ކުރިއަށްދިޔަ ފޯރިގަދަ ކެމްޕޭންގައި ރައީސް ނަޝީދު ވަނީ ރީނދޫ ލަޝްކަރު އަލުން ރުކުރުވާލައްވާނެ ކަމަށް ވައުދުވެވަޑައިގެންފައެވެ. މީކާއިލްގެ ކެމްޕޭން ބިނާކުރައްވާފައިވަނީ އިތުބާރުގެ ޝިއާރުގެ ދަށުން، ޕާޓީގެ އެތެރޭގެ ފެކްޝަންތައް އެއްގޮތްކޮށް، އާންމު މެންބަރުންނާއި ލޯކަލް ކައުންސިލަރުންގެ ބާރުވެރިކަން އިތުރުކުރުމުގެ މައްޗަށެވެ.
އެމްޑީޕީން ބުނީ އިންތިހާބުގެ ކަންކަން އޮބްޒާވްކުރުމަށާއި ޝަކުވާތައް ބެލުމަށް ހާއްސަ ކޮމްޕްލަޔަންސް ކޮމިޓީއެއް އެކުލަވާލައި، އިންތިޒާމުތައް ފުރިހަމަކޮށްފައިވާ ކަމަށެވެ.
ކިޔުންތެރިންގެ ހިޔާލު