އެމަނިކުފާނުގެ އަމިއްލަ އެއްވެސް ދަތުރުފުޅެއްގައި ސަރުކާރުގެ ނުވަތަ ރައްޔިތުންގެ ފައިސާ ބޭނުންކުރައްވާފައި ނުވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ރައީސް ވިދާޅުވީ، މަގާމާ ހަވާލުވެވަޑައިގަތް ދުވަހުން ފެށިގެން މިއަދާ ހަމައަށް އެމަނިކުފާނާއި، އަނބިކަނބަލުން އަދި ދަރިކަލުން ކުރެއްވި އަމިއްލަ އެއްވެސް ދަތުރުފުޅަކަށް ދައުލަތުން އެންމެ ފައިސާ ފޮއްޗެއް ވެސް ހޭދަކޮށްފައި ނުވާނެ ކަމަށެވެ.
ރައީސް ފާހަގަކުރެއްވި ގޮތުގައި ބައެއް ދަތުރުފުޅުތަކަކީ އަމިއްލަ ޗުއްޓީ ދަތުރުތައް ކަމުގައި ވިޔަސް، އެ ދަތުރުފުޅުތަކުގައި ރަސްމީ ވަޒީފާގެ މަސްއޫލިއްޔަތުތައް ފުރިހަމައަށް އަދާކުރައްވައެވެ. އެގޮތުން ރައީސް އޮފީހުގެ މުވައްޒަފަކު ޕްރިންޓަރާއި ސްކޭނަރު ހިފައިގެން ގޮސް، އޮފީހުން ފޮނުވާ ނޯޓުތަކާއި ސިޓީތައް ތައްޔާރުކޮށް، ސޮއިކުރުމުގެ ކަންކަން ކުރިއަށް ގެންދާ ކަމަށް ވިދާޅުވިއެވެ.
އަދި އެފަދަ ދަތުރުތަކުގައި އެހީތެރިވުމަށްދާ މުވައްޒަފުގެ ޚަރަދުތައް ވެސް ބައެއް ފަހަރު އެމަނިކުފާނު އަމިއްލައަށް ކުރައްވާފައިވާނެ ކަމަށް ރައީސް ވިދާޅުވިއެވެ. އެއީ ރައީސް އޮފީހުގެ ތާރީޚުގައި ވެސް ކަން ހިނގާފައިވާ ގޮތް ނޫން ކަމަށްވާތީ އެގޮތަށް ނުހެއްދެވުމަށް އޮފީހުން އިލްތިމާސްކުރި ނަމަވެސް، އަމިއްލަ ޗުއްޓީއެއްގައި ހުންނަވައިގެން ދައުލަތުގެ ޚަރަދު ބޭނުންކުރައްވަން ގަބޫލުފުޅުނުކުރެއްވޭތީ އެކަން އެގޮތަށް ކުރައްވަނީ ކަމަށް ވިދާޅުވިއެވެ.
ރައީސް މުއިއްޒު ވިދާޅުވީ އަމިއްލަ ދަތުރުފުޅުތަކުގައި ސަރުކާރުގެ ފައިސާ ބޭނުންކުރުމުގެ ބާރު ގާނޫނުން ރައީސުލްޖުމްހޫރިއްޔާއަށް ލިބިދޭ ކަމަށެވެ. އަދި މީގެ ކުރީގެ ހުރިހާ ރައީސުންނެއް ވެސް އެގޮތަށް އަމަލުކުރެއްވި ކަމަށާއި، މިހާރު ވެސް ކުރީގެ ބައެއް ރައީސުން ރާއްޖޭން ބޭރަށް ވަޑައިގަންނަވަނީ ސަރުކާރުގެ ޚަރަދުގައިކަން ރައީސް ފާހަގަކުރެއްވިއެވެ. ނަމަވެސް ގާނޫނުން ބާރު ލިބުނު ކަމުގައި ވިޔަސް އެމަނިކުފާނު އެގޮތަށް އަމަލުކުރައްވަން ބޭނުންފުޅުނުވަނީ ކަމަށް ވިދާޅުވިއެވެ.
ކިޔުންތެރިންގެ ހިޔާލު