ހަކުރުބައްޔަށް ފަރުވާކުރުމަށް ބޭނުންކުރާ ބައެއް ބާވަތްތަކުގެ އިންސިއުލިން ލިބުމުގައި ދަތިތަކެއް އުޅޭކަމަށް ބުނެ މީސްމީޑިއާގައި އާންމުން ފާޅުކުރި ކަންބޮޑުވުންތަކާ ގުޅިގެން، އިންސިއުލިން ގަލަމާއި އިންސިއުލިން އަދިވެސް ލިބެން އެބަހުރިކަން ހެލްތު މިނިސްޓްރީއާއި އެސްޓީއޯ އިން ކަށަވަރުކޮށްދީފިއެވެ.
ސޯޝަލް މީޑިއާގައި މީހަކު ކުރި ޕޯސްޓެއްގައި ވަނީ މާލޭގެ ހުރިހާ ބޭސްފިހާރައަކުން ‘ނޯވޯފައިން’ އިންސިއުލިން ގަލަން ހުސްވެފައިވާ ކަމަށެވެ. އަދި އެހެން މީހަކު ބުނީ ހުރިހާ ބޭސްފިހާރައަކަށް ދިޔައިރު ވެސް އިންސިއުލިން ނުލިބުނު ކަމަށެވެ.
ހެލްތު މިނިސްޓްރީގެ އޮފިޝަލަކު ވިދާޅުވީ ހަކުރުބަލީގެ މީހުންނަށް ބޭނުންވާ ވަކި ޚާއްޞަ ބްރޭންޑްތަކެއް ލިބެން ނެތް ނަމަވެސް، އާންމުގޮތެއްގައި ބޭސްފިހާރަތަކުން އިންސިއުލިން ގަލަމާއި އިންސިއުލިން ބޭސް ލިބެން ހުންނާނެ ކަމަށެވެ.
ރާއްޖެއަށް އެންމެ ގިނައިން ބޭސް އެތެރެކުރާ ފަރާތްކަމަށްވާ އެސްޓީއޯއިންވެސް ވަނީ، ހަކުރުބައްޔަށް ފަރުވާކުރުމަށް ބޭނުންކުރާ އިންސިއުލިން ގަލަމާއި އިންސިއުލިން އެ ކުންފުނީގެ ބޭސްފިހާރަތަކުން ލިބެން ހުރިކަން ކަށަވަރުކޮށްދީފައެވެ.
ލިބެން ހުރި ތަފާސްހިސާބުތަކަށް ބަލާއިރު، ދިވެހިރާއްޖޭގައި ކޮންމެ ދިހަ މީހަކުން އެކަކީ ހަކުރުބަލި ތަހައްމަލުކުރަމުންދާ މީހެކެވެ.
އާސަންދަ ކުންފުނީގެ މެނޭޖިންގ ޑިރެކްޓަރ އާމިނަތު ޒީނިޔާ ވަނީ، ހަކުރުބައްޔާ ގުޅުންހުރި ބޭސްތައް ހިމެނޭގޮތަށް ބޭސް ލިބުމުގެ ދަތިކަމަކީ އާންމުންގެ ވަރަށް ބޮޑު ކަންބޮޑުވުމެއްކަން ޤަބޫލުކުރައްވައި، އެކަމާ ގުޅޭ ޝަކުވާތައް ކަމާބެހޭ ފަރާތްތަކަށް އަދިވެސް ލިބެމުންދާކަން ފާހަގަކުރައްވާފައެވެ.
މިދިޔަ އަންގާރަ ދުވަހު ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިޒަސް ކޮމިޓީގައި ވާހަކަދައްކަވަމުން ޒީނިޔާ ވަނީ، ރާއްޖެއަށް ބޭސް އެތެރެކުރުމާއި އާސަންދަ ސްކީމްގެ ދަށުން ބޭސް ފޯރުކޮށްދިނުމުގެ ނިޒާމުގެ ތެރޭގައި ހުރި ބޮޑެތި ގޮންޖެހުންތަކަށް އަލިއަޅުވާލައްވާފައެވެ.
އޭނާ ފާހަގަކުރެއްވި ގޮތުގައި، މޯލްޑިވްސް ފުޑް އެންޑް ޑްރަގް އޮތޯރިޓީން ފާސްކޮށްފައިވާ ލިސްޓުގެ މައްޗަށް ބިނާކޮށް އާސަންދައިން ބޭސް ފޯރުކޮށްދިން ނަމަވެސް، ރަޖިސްޓަރީކުރުމުގެ މަރުޙަލާގައި ‘އެސެންޝަލް މެޑިސިންސް ލިސްޓް’ ގައި ހިމެނޭ ހުރިހާ ބޭހެއްގެ ސްޓޮކް ބޭސްފިހާރަތަކުގައި ހުރިކަން ކަށަވަރުކުރުމުގައި އުނިކަންތަކެއް އެބަހުއްޓެވެ.
ބޭސް ލިބުމަށާއި އާސަންދަ ކަވަރޭޖަށް އަސަރުކުރާ އެންމެ ބޮޑު އެއް މައްސަލައަކީ ރާއްޖެއަށް އެތެރެކުރާ ވަކި ބްރޭންޑްތައް ގިނަގިނައިން ބަދަލުވަމުންދިއުން ކަމުގައި ޒީނިޔާ ފާހަގަކުރެއްވިއެވެ.
އާންމުންނަށް ޖެހޭ ބަލިތަކަށް ބޭނުންވާ އަސާސީ ބޭސް މެދުނުކެނޑި ލިބޭނެ އިންތިޒާމު ހަމަޖެއްސުމަކީ ސިއްޙީ ދާއިރާގެ އެންމެ އިސް އެއް އަމާޒުކަމަށް ހެލްތު މިނިސްޓަރ ގީލާ އަލީ މީގެ ކުރިން ވަނީ ވިދާޅުވެފައެވެ. އަދި ޤައުމީ ފެންވަރުގެ ޚާއްޞަ ބޭސް ކުންފުންޏެއް އުފެއްދުމާއެކު މިފަދަ ގޮންޖެހުންތަކަށް ޙައްލެއް ލިބިގެންދާނެ ކަމުގެ އުންމީދުވެސް އެކަމަނާ ވަނީ ފާޅުކުރައްވާފައެވެ.
ކިޔުންތެރިންގެ ހިޔާލު