ދިވެހިރާއްޖެއާއި އެމެރިކާއާ ދެމެދު ދިފާޢީ އަދި ސަލާމަތީ ގުޅުން ބަދަހިކުރުމާ ގުޅޭގޮތުން މަޝްވަރާތަކެއް ކުރިއަށް ގެންގޮސްފިއެވެ.
މި މަޝްވަރާތައް ކުރިއަށް ދިޔައީ ބުދަ ދުވަހު، ދިވެހިރާއްޖޭގެ ފޮރިން ސެކްރެޓަރީ ފާޠިމަތު ޢިނާޔާ އާއި އެމެރިކާއިން ސްރީލަންކާ އަދި ރާއްޖެއަށް ކަނޑައަޅާފައި ހުންނަވާ ސީނިއަރ ޑިފެންސް އޮފިޝަލް އަދި ޑިފެންސް އެޓާޗޭ، ލެފްޓިނެންޓް ކާނަލް މެތިއު އޭ. ހައުސް އާ ދެމެދު ބޭއްވެވި ބައްދަލުވުމެއްގައެވެ.
ފޮރިން މިނިސްޓްރީން މަޢުލޫމާތުދޭ ގޮތުގައި، މި މަޝްވަރާތަކުގައި މައިގަނޑު ގޮތެއްގައި އަލިއަޅުވާލާފައިވަނީ ރާއްޖެއާއި އެމެރިކާއާ ދެމެދު ދިފާޢީ އަދި ސަލާމަތީ ކަންކަމުގައާއި، ކަނޑުމަތީގެ ސަލާމަތާ ގުޅޭގޮތުންނާއި، ދެފަރާތުގެ މަސްލަޙަތު ހިމެނޭ އެހެނިހެން ދާއިރާތަކުން ގުޅުން ބަދަހިކުރުމަށެވެ.
މިއަހަރަކީ ރާއްޖެއާއި އެމެރިކާއާ ދެމެދު ސިޔާސީ ގުޅުން ޤާއިމުކުރިތާ 60 އަހަރު ފުރޭ އަހަރެވެ.
ދެ ޤައުމުގެ ދެމެދުގައި 2020 ވަނަ އަހަރު ވަނީ ދިފާޢީ ގޮތުން އެއްބާރުލުން ދިނުމުގެ އެއްބަސްވުމެއްގައި ސޮއިކޮށްފައެވެ. މި އެއްބަސްވުމުގެ ދަށުން، ރާއްޖޭގެ ކަނޑުމަތީގެ ސަލާމަތީ ޤާބިލުކަން އިތުރުކުރުމަށް އެމެރިކާއިން އަންނަނީ އެހީތެރިކަން ފޯރުކޮށްދެމުންނެވެ.
އަސްކަރީ ތަމްރީނާއި އެހީތެރިކަންމީގެ ތެރޭގައި މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އަށް ބޭނުންވާ އާލާތްތައް ފޯރުކޮށްދިނުމާއި ތަމްރީނު ދިނުން ހިމެނެއެވެ.
މިއަހަރުގެ ކުރީކޮޅު އެމެރިކާއާއި ރާއްޖެ ގުޅިގެން ވަނީ ‘އެކްސަސައިޒް ފްލޭޝް މެޓަލް’ ގެ ނަމުގައި އަސްކަރީ ތަމްރީނުތަކެއް ކުރިއަށް ގެންގޮސްފައެވެ. މި ތަމްރީނުތަކުގެ މަޤުޞަދަކީ ގުޅިގެން މަސައްކަތްކުރުމުގެ ޤާބިލުކަން އިތުރުކުރުމާއި، ޚާއްޞަ ހަނގުރާމަމަތީ ޤާބިލުކަން އިތުރުކުރުމާއި، ކަނޑުމަތީގެ ސަލާމަތްތެރިކަން ކަށަވަރުކުރުމެވެ.
ހަމައެއާއެކު، އެމެރިކާއިން ދެކުނު އަދި މެދުތެރޭ އޭޝިއާގެ ކަންކަމަށް ކަނޑައަޅާފައި ހުންނަވާ ސްޕެޝަލް އެންވޯއީ ސަރޖިއޯ ގޯރ ވަނީ މިދިޔަ މާރިޗު މަހު ރާއްޖެއަށް ޒިޔާރަތްކުރައްވާފައެވެ. މި ދަތުރުފުޅުގައި އޭނާ ވަނީ ދިވެހި ސަރުކާރުގެ އިސް އޮފިޝަލުންނާއެކު ދިފާޢީ އަދި ސަލާމަތީ ގޮތުން ގުޅުން ބަދަހިކުރުމާ ގުޅޭގޮތުން މަޝްވަރާކުރައްވާފައެވެ.
ކިޔުންތެރިންގެ ހިޔާލު