އާސަންދައިން 3000 އަށްވުރެ ގިނަ ބޭސް ދޫކުރާއިރު ރައްޔިތުން ބޭސް ނުލިބޭކަމުގެ ޝަކުވާއަކީ ސީރިއަސް މައްސަލައެއްގެ ގޮތުގައި ބަލަންޖެހޭކަމެއްކަމަށް އާސަންދަ ކުންފުނީގެ މެނޭޖިންގ ޑިރެކްޓަރ އާމިނަތު ޒީނިޔާ ވިދާޅުވެއްޖެއެވެ. ޒީނިޔާ މިހެން ވިދާޅުވީ ރައްޔިތުންގެ މަޖިލީހުގެ އެސްއޯއީ ކޮމިޓީގެ ވާހަކަ ދައްކަވަމުންނެވެ.
ކޮމިޓީގައި ވާހަކަފުޅު ދައްކަވަމުން އާސަންދަ ކުންފުނީގެ މެނޭޖިންގ ޑިރެކްޓަރ އާމިނަތު ޒީނިޔާ ވިދާޅުވީ ބޭހުގެ މައްސަލައިގައި އެކި މަރުޙަލާތަކުގައި ހައްލު ނުކުރެވިގެން އުޅޭ އެތައް މައްސަލަތަކެއް އެބަހުރިކަމަށެވެ.
ޒީނިޔާ ވިދާޅުވީ، އާސަންދައިގެ ދަށުން ކުރާ ޚަރަދުގެ 60 އިންސައްތައަކީ ފާމަސީތަކަށް ކުރާ ޚަރަދުކަމަށެވެ. އެގޮތުން ރާއްޖޭގައި ހުރި 800 އަށްވުރެ ގިނަ ފާމަސީއަށް އާސަންދައިގެ ދަށުން ބޭސް ލިސްޓުން 3000 އަށްވުރެ ގިނަ ބޭސް ދޫކުރާއިރު ރައްޔިތުން ބޭސް ނުލިބޭކަމުގެ ޝަކުވާއަކީ ސީރިއަސް މައްސަލައެއްގެ ގޮތުގައި ބަލަންޖެހޭކަމެއްކަމަށް ޒީނިޔާ ވިދާޅުވިއެވެ.
އަޅުގަނޑުމެންގެ ޕޭއަބްލްސްގެ ގާތްގަނޑަކަށް ސްކީމްގެ 60 އިންސައްތަ ހޭދަކުރަނީ ފާމަސީތަކަށް، އެހެންވީމަ މިހާބޮޑު ޚަރަދެއްކުރާއިރުވެސް ސްކީމްގެ ތެރެއިން މީހުންނަށް ބޭސްލިބުމުގައި ދަތިތައް އެބަހުރި. އެހެންވީމަ އެބަޖެހޭ ބަލަން މިވަނީ ކިހިނެތްކަން.
އާސަންދަ ކުންފުނީގެ މެނޭޖިން ޑިރެކްޓަރ ވިދާޅުވިއެވެ.
މޯލްޑިވްސް ފުޑް އެންޑް ޑްރަގް އޮތޯރިޓީއިން އެކުލަވާލާފައި އޮންނަ ޑްރަގް ލިސްޓަކަށް ބޭސް އެތެރެކުރާއިރު، އެސެންޝިއަލް މެޑިސިން ލިސްޓު ނުވަތަ ޒަރޫރީ ބޭސް ލިސްޓުގައި ހިމެނޭ ބޭސްތައް ރާއްޖޭގެ ކޮންމެ ފާމަސީއަކުން ލިބެންޖެހޭކަމަށް ކަނޑައަޅާފައިއޮތްނަމަވެސް އެކަން ކަށަވަރު ނުކުރެވޭކަން ޒީނިޔާ ވިދާޅުވިއެވެ. އަދި އެމްއެފްޑީއޭއިން ފާމަސީ ރަޖިސްޓްރީކުރުމުގެ ހުއްދަ ދިނުމުން، ޒަރޫރީ ބޭސް ލިސްޓުގައި ހުންނަ ބޭސްތައް ލިބެންޖެހޭނެކަމަށް އޮތްނަމަވެސް ފާމަސީތަކުން އެގޮތަށް ޢަމަލު ނުކުރާކަމަށާއި އެކަން ބެލޭނެ ނިޒާމެއްވެސް ޤާއިމުވެފައި ނެތްކަމުގެ ކަންބޮޑުވުން ޒީނިޔާވަނީ ވިދާޅުވެފައެވެ.
ކިޔުންތެރިންގެ ހިޔާލު