މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ހާމަކުރާ ގޮތުގައި، ރެމިޓެންސްގެ ގޮތުގައި މިދިޔަ އަހަރު ރާއްޖޭން ބޭރަށް ވަނީ ޖުމްލަ 167.6 މިލިއަން ޑޮލަރު ފޮނުވާފައެވެ.
އެމްއެމްއޭގެ އަހަރީ ރިޕޯޓުން ދައްކާ ގޮތުގައި މިއީ އޭގެ ކުރީ އަހަރާ އަޅާބަލާއިރު 8 އިންސައްތައިގެ ކުރިއެރުމެކެވެ. ވިޔަފާރި ނޫން ބޭނުންތަކަށް ރާއްޖޭން ބޭރަށް ފައިސާ ފޮނުވުމަށް (އައުޓްވާޑް ރެމިޓެންސްގެ ގޮތުގައި) މިދިޔަ އަހަރު 139،000 މުއާމަލާތް ވަނީ ކޮށްފައެވެ. މިއީ 2024 ވަނަ އަހަރާ އަޅާބަލާއިރު 13 އިންސައްތައިގެ އިތުރުވުމެކެވެ.
ރާއްޖޭން ބޭރަށް ފައިސާ ފޮނުވި ފަރާތްތަކަށް ބަލާއިރު، އައުޓްވާޑް ރެމިޓެންސްގެ ބޮޑުބައެއް ހިއްސާކުރަނީ ބިދޭސީންނެވެ. އެގޮތުން 94 އިންސައްތަ މުއާމަލާތް ބިދޭސީން ކޮށްފައިވާއިރު، ބާކީ 6 އިންސައްތަ މުއާމަލާތް ކޮށްފައިވަނީ ދިވެހިންނެވެ. ދިވެހިން ކޮށްފައިވާ މުއާމަލާތްތަކުގެ ނިސްބަތް މަދު ނަމަވެސް، މިއީވެސް 2024 ވަނަ އަހަރާ އަޅާބަލާއިރު އިތުރުވެފައިވާ އަދަދެއް ކަމަށް ރިޕޯޓުގައި ފާހަގަކޮށްފައިވެއެވެ.
ރާއްޖޭން ބޭރަށް ފައިސާ ފޮނުވި މިންވަރު އިތުރުވެފައިވާއިރު، ރާއްޖެއަށް އެތެރެވި ފައިސާ ނުވަތަ އިންވާޑް ރެމިޓެންސްގެ އަދަދުވެސް ވަނީ އިތުރުވެފައެވެ. ރާއްޖެއިން ބޭރުވި ފައިސާއާ ޚިލާފަށް، ރާއްޖެއަށް އެތެރެވި ފައިސާގެ 82 އިންސައްތަ ހިއްސާކުރަނީ ދިވެހިންނެވެ. އަދި މިދިޔަ އަހަރާ އަޅާބަލާއިރު ދިވެހިންނަށް ފައިސާ ލިބުނު މިންވަރު ވަނީ 4 އިންސައްތަ އިތުރުވެފައެވެ.
ކިޔުންތެރިންގެ ހިޔާލު