ކުޑަކުދިންގެ މެދުގައި އާންމު ނަފްސާނީ މައްސަލައެއް ކަމަށްވާ އޭޑީއެޗްޑީއަށް ފަރުވާ ދިނުމަށް ބޭނުންކުރާ މުހިންމު ބޭހެއް ކަމަށްވާ ‘މެތައިލްފެނިޑޭޓް’ ރާއްޖޭގައި މަނާކޮށްފައިވާ މަސްތުވާތަކެތީގެ ލިސްޓުން އުނިކުރުމަށް ސަރުކާރުން ރައްޔިތުންގެ މަޖިލީހަށް ހުށަހަޅައިފިއެވެ.
މި ބޭސް މަނާ ތަކެތީގެ ލިސްޓުން އުނިކުރުމަށް ނިންމީ ނޭޝަނަލް ޑްރަގް ކޮންޓްރޯލް ކައުންސިލްގެ ލަފަޔާއެކު ވަޒީރުންގެ މަޖިލީހުގައި މަޝްވަރާކުރުމަށްފަހުއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަޖިލީހުގެ ރައީސް ޢަބްދުއްރަޙީމް ޢަބްދުﷲ އަށް ފޮނުއްވި ސިޓީގައި ވިދާޅުވެފައިވަނީ، މެތައިލްފެނިޑޭޓަކީ އޭޑީއެޗްޑީ ހުންނަ ކުދިންނަށް ދެވޭ އެންމެ މުހިންމު އެއް ފަރުވާ ކަމަށެވެ. ނަމަވެސް، މިހާރު މި ބޭސް ހިމެނިފައިވަނީ މަސްތުވާތަކެއްޗާ ބެހޭ ގާނޫނުގެ ޖަދުވަލު 1 ގައިވާ މަނާ ތަކެތީގެ ތެރޭގައެވެ.
މި މައްސަލަ މިހާރު ވަނީ އިތުރަށް ދިރާސާކުރުމަށްޓަކައި މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީ (241 ކޮމިޓީ) އަށް ފޮނުވާފައެވެ.
މި ބޭސް މަނާ ތަކެތީގެ ލިސްޓުން އުނިކުރުމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ވެސް ވަނީ މިދިޔަ އަހަރުގެ ޖުލައި މަހު އެދިފައެވެ. މި ބޭސް މަނާ ތަކެތީގެ ލިސްޓުން އުނިކުރުމުން، އޭޑީއެޗްޑީ ހުންނަ ކުދިންނަށް ބޭނުންވާ ފަރުވާ ރާއްޖެއިން ލިބުމަށް މަގުފަހިވެ، އެ ކުދިންގެ ބެލެނިވެރިންނަށް ކުރިމަތިވެފައިވާ ބޮޑު ތަކުލީފަކަށް ހައްލެއް ލިބިގެންދާނެއެވެ. ސަރުކާރުގެ މި ނިންމުމަކީ ސިއްހީ ދާއިރާއިން އަޅާ ވަރަށް މުހިންމު ފިޔަވަޅެކެވެ.
ކިޔުންތެރިންގެ ހިޔާލު