މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން މިދިޔަ އަހަރުގެ ތެރޭގައި ޖުމްލަ 1.1 ބިލިއަން ޑޮލަރު (17 ބިލިއަން ރުފިޔާ) ވިއްކާފައިވާކަން އެ އޮތޯރިޓީގެ އަހަރީ ރިޕޯޓުން ހާމަވެއްޖެއެވެ.

މިއީ 2024 ވަނަ އަހަރާ އަޅާބަލާއިރު 10 އިންސައްތައިގެ ކުރިއެރުމެކެވެ. ތަފާސްހިސާބުތައް ދައްކާގޮތުން 2024 ވަނަ އަހަރު 998 މިލިއަން ޑޮލަރު އަދި 2023 ވަނަ އަހަރު 994 މިލިއަން ޑޮލަރު އެމްއެމްއޭއިން ވަނީ ވިއްކާފައެވެ. މިދިޔަ އަހަރު ވިއްކި ޑޮލަރުގެ އެންމެ ބޮޑު ބައެއް 60 އިންސައްތަ ދޫކޮށްފައިވަނީ ސަރުކާރު ހިއްސާވާ ކުންފުނިތަކަށެވެ. އެއީ ގާތްގަނޑަކަށް 651 މިލިއަން ޑޮލަރު ނުވަތަ 10 ބިލިއަން ރުފިޔާއެވެ.

ސަރުކާރު ކުންފުނިތަކަށް ދޫކުރި ޑޮލަރު މައިގަނޑު ގޮތެއްގައި ބޭނުންކޮށްފައިވަނީ ތެލާއި، އަސާސީ ކާބޯތަކެއްޗާއި، ބޭހުގެ އިތުރުން މެޑިކަލް ސާމާނު ގަތުމަށާއި ކުންފުނިތަކުގެ ދަރަނި އަދާކުރުމަށެވެ. މީގެ ތެރެއިންވެސް 70 އިންސައްތަ ހޭދަކޮށްފައިވަނީ ރާއްޖެއަށް ބޭނުންވާ ތެޔޮ އެތެރެކުރުމަށެވެ. އެގޮތުން ތެޔޮ ގަތުމަށް އެކަނިވެސް އެމްއެމްއޭއިން ވަނީ 460 މިލިއަން ޑޮލަރު އެސްޓީއޯއަށް ވިއްކާފައެވެ.

މީގެ އިތުރުން، ދައުލަތުގެ ދަރަނި އަދާކުރުމަށް އެމްއެމްއޭއިން 436 މިލިއަން ރުފިޔާ ދޫކޮށްފައިވާއިރު، ދަރަންޏާއި ސަރުކާރު ކުންފުނިތަކަށް ދޫކުރި އަދަދު އެކަނިވެސް އެއް ބިލިއަން ރުފިޔާއަށްވުރެ މައްޗަށް އަރައެވެ. އަދި އާންމުންނާއި ވިޔަފާރިތަކަށް ބޭނުންވާ ޑޮލަރު ފޯރުކޮށްދިނުމަށް ބޭންކްތަކަށް މިދިޔަ އަހަރު ވަނީ 448 މިލިއަން ޑޮލަރު ދޫކޮށްފައެވެ. މިއީ 2024 ވަނަ އަހަރާ އަޅާބަލާއިރު 25 އިންސައްތަ އިތުރު އަދަދެކެވެ.