ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ބޮލުގައި އެއްވެސް ހަގީގަތެއް ނެތް ދޮގު އިލްޒާމް އަޅުވައި ‘އަދަދު’ ނޫހުން އުފައްދާފައިވާ ޑޮކިއުމެންޓްރީއާ ގުޅިގެން، އަދަދު ނޫހުގެ އެޑިޓަރު ހަސަން މުހައްމަދު ފުލުސް އޮފީހަށް ހާޒިރުކުރުމުން ހަނުހުރުމުގެ ހައްގުގެ ބޭނުންކޮށްފިއެވެ.
ހަސަންގެ ގާނޫނީ ވަކީލު ސައްޔާހު ހަލީލް ވިދާޅުވީ ގާނޫނުއަސާސީން ލިބިދީފައިވާ ހައްގަކަށްވާތީ ހަނުހުރުމުގެ ހައްގުގެ ބޭނުން ހަސަން މިއަދު އިޚްތިޔާރުކޮށްފައިވާ ކަމަށެވެ.
މިދިޔަ މަހު ފަހުކޮޅު އާންމު ކުރި އެ ޑޮކިއުމެންޓްރީގެ މައްސަލައިގައި ފުލުހުން ރޭ ވަނީ ކޯޓު އަމުރެއްގެ ދަށުން އަދަދު ނޫހުގެ އޮފީސް ބަލައިފާސްކޮށް ހެކީގެ ގޮތުގައި ބޭނުން ހިފިދާނެ ކަމަށް ބެލެވޭތަކެތި ގެންގޮސްފައެވެ.
އެ މައްސަލައާ ގުޅިގެން އަދަދު ނޫހުގެ ސީއީއޯ ހުސައިން ފިޔާޒު މޫސާއަށް ވެސް ވަނީ ފުލުސް އޮފީހަށް ހާޒިރުވާން ޗިޓެއް ފޮނުވައިފައެވެ. އޭނާ ހާޒިރުކުރަނީ މިއަދު 2:30 އަށެވެ. އެ ޗިޓުގައި ސަބަބެއް ކަމަށް ބުނެފައި އޮތީ، “ރައީސް މުހައްމަދު މުއިއްޒު ގަޒްފުކޮށްފައިވާ ކަމަށް ތުހުމަތުކޮށް، އައިޝާ ނަމުގައި ވީޑިއޯ ރިޕޯޓެއް ޝާއިއުކޮށްފައިވާ މައްސަލައިގައި ބައިވެރިވުން އޮތް ކަމަށް ތުހުމަތު ކުރެވޭތީ” ކަމަށެވެ.
ހޯމަ ދުވަހު ބޭއްވި ނޫސްވެރިންގެ ބައްދަލުވުމެއްގައި ‘އަދަދު’ ނޫހުން ވަނީ ރައީސް މުއިއްޒުއާ އެ ޑޮކިޔުމެންޓްރީއާ ގުޅުވައި ސުވާލެއްކޮށްފައެވެ. އެ ސުވާލުގެ ޖަވާބުގައި ރައީސް ވިދާޅުވީ އެއީ “ކަނޑައެޅިގެން ދޮގު ކަމަށެވެ” އަދި “ދޮގު ވާހަކަ ދެއްކި ހުރިހާ ފަރާތްތަކާ ދެކޮޅަށް ދައުވާ ކުރަން” ކަމާ ބެހޭ ހުރިހާ ފަރާތްތަކުގެ ކިބައިން އެދިވަޑައިގަންނަވާ ކަމަށް ރައީސް ވިދާޅުވިއެވެ.
ކިޔުންތެރިންގެ ހިޔާލު