އިދިކޮޅު އެމްޑީޕީން މިހާރު ކުރިއަށްގެންދާ އިހުތިޖާޖުތަކަކީ ރާއްޖޭގެ ތަޞައްވުރު ކިލަނބުކޮށް، ގައުމުގެ މިސްރާބު އޮޅުވާލުމަށް ކުރާ ކަމެއް ކަމަށް ވިދާޅުވެ، ރައްޔިތުންގެ މަޖިލީހުގެ މަތިވެރި ދާއިރާގެ މެންބަރު ޙަސަން ޒަރީރު ފާޑުވިދާޅުވެއްޖެއެވެ.
ކެންދޫ ދާއިރާގެ މެންބަރު މަޢުރޫފް ޒާކިރު ހުށަހެޅުއްވި ވަޒީފާއާ ބެހޭ ގާނޫނަށް އިސްލާހު ގެނައުމުގެ ބިލަށް ބަހުސް ކުރައްވަމުން ޒަރީރު ވިދާޅުވީ މެދުއިރުމަތީގެ ހަމަނުޖެހުންތަކާ ގުޅިގެން ރާއްޖެއަށް އަންނަ ފަތުރުވެރިންގެ އަދަދު މަދުވަމުންދާ މި ދަނޑިވަޅުގައި، މިފަދަ އިހުތިޖާޖުތައް ކުރުމަކީ ރާއްޖެއަކީ ހަމަޖެހުމެއް ނެތް ގައުމެއްގެ ގޮތުގައި ބޭރު ދުނިޔެއަށް ދެއްކުމަށް ކުރާ މަސައްކަތެއް ކަމަށެވެ.
ސަރުކާރުން މިހާރުގެ ހާލަތު ބަދަލުކުރުމަށް ގިނަ ފިޔަވަޅުތަކެއް އަޅަމުންދާކަން ފާހަގަކުރައްވައި، ޒަރީރު ވިދާޅުވީ މިއީ ސަރުކާރަށް އިތުރު ޑިމާންޑްތަކެއް ކުރަންވީ ވަގުތެއް ނޫން ކަމަށެވެ. އަދި ރައްޔިތުންނަށް މައުލޫމާތު ދޭންވާނީ ހަގީގީ ހިސާބުތަކުގެ މައްޗަށް ބިނާކޮށް ކަމަށް އޭނާ ވިދާޅުވިއެވެ.
ސަރުކާރު ޖަވާބުދާރީ ކުރުވުމަކީ އިދިކޮޅު ފަރާތްތަކުގެ ޒިންމާއެއް ނަމަވެސް، ގައުމުގެ އިގްތިސާދީ ހާލަތާ ގުޅޭގޮތުން ދޮގު މައުލޫމާތު ފެތުރުމަކީ ބަލައިގަނެވޭނެ ކަމެއް ނޫން ކަމަށް ޒަރީރު ވިދާޅުވިއެވެ.
ލޯކަލް ކައުންސިލް އިންތިޚާބަށްފަހު އެމްޑީޕީން އަންނަނީ މާލޭގެ މަގުތަކުގައި ސިލްސިލާ މުޒާހަރާތަކެއް ކުރަމުންނެވެ.
ކިޔުންތެރިންގެ ހިޔާލު