ރޭ އެއްވުމެއް ހިނގަމުންދިޔަ ސަރަހައްދަކުން ހޮސްޕިޓަލަށް ގެންދެވުނު މީހަކަށް އަނިޔާވީ ފުލުހުން އެޅި ފިޔަވަޅުތަކެއްގެ ސަބަބުން ކަމަށް ބުނެ ފެތުރެމުންދާ ވާހަކަތައް ދިވެހި ފުލުހުންގެ ޚިދުމަތުން ދޮގުކޮށްފިއެވެ.
ފުލުހުން ނެރުނު ނޫސްބަޔާނެއްގައި ބުނެފައިވާ ގޮތުގައި، އެއްވުން ކޮންޓްރޯލް ކުރުމަށް ފުލުހުން ހިންގި އެއްވެސް ހަރަކާތަކާ އެ މީހާއަށް އަނިޔާ ލިބުމާ ގުޅުމެއް ނެތެވެ. އަދި ރޭގެ އެއްވުން ކޮންޓްރޯލް ކުރުމުގައި ފުލުހުން ބާރުގެ ބޭނުންކޮށްފައި ނުވާ ކަމަށް ވެސް ފުލުހުން ބުންޏެވެ.
ހަޤީޤަތާ ޚިލާފު ދޮގު މައުލޫމާތު ފެތުރުމުގެ ސަބަބުން ދައުލަތުގެ މުއައްސަސާތަކަށް އޮންނަ އިތުބާރު ކުޑަވެ، ރައްޔިތުންނަށް ފޯރުކޮށްދޭ ޚިދުމަތްތަކަށް ނޭދެވޭ އަސަރުކުރާ ކަމަށް ފުލުހުން ބުނެއެވެ. އެހެންކަމުން މައުލޫމާތުގެ ސައްޙަކަން ކަށަވަރުކުރުމަށްފަހު މެނުވީ މައުލޫމާތު ނުފެތުރުމަށް އިދާރާތަކަށާއި މީޑިއާތަކަށާއި އާންމުންނަށް ފުލުހުން ވަނީ އިލްތިމާސްކޮށްފައެވެ.
އިދިކޮޅު އެމްޑީޕީން ރޭ ވެސް ވަނީ ކުއްލި ހަރަކާތުގެ ނަމުގައި މާލޭގައި އެއްވުމެއް ބާއްވާފައެވެ. އެ އެއްވުމުގެ ބައިވެރިއަކަށް ވަނީ އަނިޔާވެ ހޮސްޕިޓަލްގައި ފަރުވާދީފައެވެ.
ކިޔުންތެރިންގެ ހިޔާލު