މާލޭގެ އުތުރު ފަރާތު ބޮޑުތަކުރުފާނު މަގު ތަރައްގީކުރުމުގެ މަޝްރޫއުގެ ފުރަތަމަ ފިޔަވަހީގެ ފަސްވަނަ ސެގްމެންޓުގެ ޖުމްލަ 45 އިންސައްތަ މަސައްކަތް ނިމިއްޖެއެވެ.
އެމްޓީސީސީން ބުނީ އެ މަޝްރޫއުގެ ބިން ހިއްކުމުގެ މަސައްކަތް މިހާރު ވަނީ އެއްކޮށް ނިމިފައި ކަމަށެވެ. އެހެންކަމުން މިހާރު ކުރިއަށްދަނީ ފެނާއި ނަރުދަމާގެ މައި ހޮޅިތައް ވަޅުލުމުގެ މަސައްކަތް ކަމަށް އެ ކުންފުނިން ބުންޏެވެ.
މީގެއިތުރުން ކާބްސްޓޯން ޖެހުމާއި، ދުވާރު ހެދުމާއި، މަގުބައްތި ޖަހާނެ ތަންތަން ތައްޔާރުކުރުމާއި، ސެޓްލްމަންޓް ޓޭންކުތަކާއި ކޭބަލް ޓްރެންޗްތައް ހެދުމުގެ މަސައްކަތް ވަނީ ދެބައިކުޅަ އެއްބަޔަށް ނިމިފައެވެ. މި މަސައްކަތްތައް ކުރިއަށް އޮތް ހަފުތާގެ ތެރޭގައި ނިންމާލުމަށް ފަހު، ފެން ހިންދާ ނިޒާމުގެ ކެޗްޕިޓްތަކާއި ކޭބަލް ޖަންކްޝަންތައް ހަރުކުރުމުގެ މަސައްކަތް ފެށުމަށް ވަނީ ތާވަލުކޮށްފައެވެ.
މި މަޝްރޫއަކީ މާލޭގެ އުތުރު ފަރާތު ބޮޑުތަކުރުފާނު މަގުގެ ޖާގަ ތަނަވަސްކޮށް، ދަތުރުފަތުރުގެ ނިޒާމު ހަރުދަނާކުރުމަށް ސަރުކާރުން ކުރިއަށްގެންދާ ވަރަށް މުހިންމު މަޝްރޫއެކެވެ.
ކިޔުންތެރިންގެ ހިޔާލު