2014 ވަނަ އަހަރު ފުލުހުންގެ ވަޒީފާއިން ވަކިކުރި ނޯތު ޕޮލިސް ޑިވިޝަންގެ ކުރީގެ ކޮމާންޑަރު އަޙްމަދު ޝިޔާމް އަލުން ވަޒީފާއަށް ނެރުމަށް ހައިކޯޓުން މިއަދު އަމުރުކޮށްފިއެވެ.
ޝިޔާމް ވަޒީފާއިން ވަކިކުރީ މެއި 2014 ގައެވެ. އެއީ ނޯތު ޕޮލިސް ޑިވިޝންގެ ކޮމާންޑަރަކަށް ހުންނެވިއިރު މަގާމުގެ ނުފޫޒު ނާޖާއިޒު ގޮތުގައި ބޭނުންކުރި ކަމުގެ ތުހުމަތުގައެވެ.
ވަޒީފާއިން ވަކިކުރި މައްސަލަ 2019 ގައި ސިވިލް ކޯޓަށް ހުށަހެޅުމުން، 2020 ގައި އެ ކޯޓުން ނިންމީ އޭނާ ވަކިކުރީ ރަނގަޅަށް ކަމަށެވެ. އެ ހުކުމް 2021 ގައި ޝިޔާމްގެ ފަރާތުން ހައިކޯޓުގައި އިސްތިއުނާފު ކުރިއެވެ.
އެ މައްސަލަ ބެލުމަށްފަހު ހައިކޯޓުން މިއަދު އިއްވި ހުކުމްގައި ވަނީ ޝިޔާމް ވަކިކުރުމަށް ފުލުހުންގެ ޑިސިޕްލިނަރީ ބޯޑުން ނިންމީ އެކަށީގެންވާ ހެކި ނެތި ކަމަށެވެ. އެހެންކަމުން އޭނާ ފުލުހުންގެ ވަޒީފާއިން ވަކިކުރީ ފުރިހަމަ ތަހުގީގަކަށްފަހު ކަމަށް ބެލެވެން ނެތް ކަމަށް ފަނޑިޔާރުން ނިންމެވިއެވެ.
އެހެންކަމުން ޝިޔާމަަށް އަލުން ވަޒީފާ ދިނުމަށާއި އޭނާ އަކީ އެއްވެސް ހާލެއްގައި ވަޒީފާއިން ވަކިވި މީހެއް ކަމުގައި ނުބެލުމަށާއި ވަޒީފާއިން ވަކިވި ދުވަހުން ފެށިގެން އަލުން ވަޒީފާ ހަމަޖެއްސުމާ ހަމައަށް ލިބެންޖެހޭ މުސާރަ އާއި އިނާޔަތްތައް އޭނާއަށް ދިނުމަށް ފުލުހުންގެ އިދާރާގެ މައްޗަށް ހައިކޯޓުން ވަނީ އަމުރުކޮށްފައެވެ.
ކިޔުންތެރިންގެ ހިޔާލު