ކުރިއަށް އޮތް ލޯކަލް ކައުންސިލް އިންތިޚާބުގައި މާލޭގެ މޭޔަރު ކަމަށް، ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ ތާއިދާއެކު ވާދަކުރެއްވި އިސްމާޢީލް ޒަރިޔަންދު، ރައީސް ޔާމީން އިސްވެ ހުންނަވައި އުފެއްދެވި ޕީޕަލްސް ނޭޝަނަލް ފްރަންޓް (ޕީއެންއެފް) އަށް ރަސްމީކޮށް ސޮއިކުރައްވައިފިއެވެ.

އޮޑިޓިން އަދި އެކައުންޓިން ދާއިރާގެ ތަޖުރިބާކާރެއްގެ އިތުރުން، ފުޓްބޯޅަ ކީޕަރެއްގެ ގޮތުގައި އާންމުންގެ މެދުގައި މަގުބޫލުކަން ހޯއްދަވާފައިވާ ޒަރިޔަންދު، ޕީއެންއެފް އަށް ސޮއިކުރެއްވީ މިދިޔަ ހޯމަ ދުވަހުގެ ރެއެވެ. އޭނާގެ މެންބަޝިޕް ފޯމާ ހަވާލުވެލެއްވީ ކުރީގެ ރައީސް ޢަބްދުﷲ ޔާމީން އެވެ.

ޒަރިޔަންދު ޕީއެންއެފް އަށް ސޮއިކުރައްވާފައި މިވަނީ، މިދިޔަ ހޮނިހިރު ދުވަހު ބޭއްވުނު މާލޭގެ މޭޔަރު ހޮވުމުގެ އިންތިޚާބަށް ފަހުގައެވެ. މި އިންތިޚާބުގައި އަމިއްލަ ގޮތުން ވާދަކުރައްވައި، ޒަރިޔަންދަށް ލިބިވަޑައިގަތީ 6،302 ވޯޓެވެ.

ރައީސް ޔާމީންގެ ފަރާތްޕުޅުން އިންތިޚާބުގައި ނުކުމެވަޑައިގެންނެވި ޒަރިޔަންދު މިހާރު ވަނީ ރަސްމީކޮށް އެމަނިކުފާނުގެ ސިޔާސީ ހަރަކާތްތަކުގައި ބައިވެރިވެވަޑައިގަންނަވަން ފަށްޓަވާފައެވެ.