އެއް މަސްދުވަހުގެ މެދުކެނޑުމަކަށްފަހު ރައްޔިތުންގެ މަޖިލީހުގެ ޖަލްސާތައް އަންނަ ހަފުތާގައި ފެށުމަށް ތައްޔާރުވެއްޖެއެވެ. މަޖިލީހުގެ ޖަލްސާތައް އެންމެ ފަހުން ބާއްވާފައިވަނީ މިދިޔަ މާރިޗް މަހުގެ 8 ވަނަ ދުވަހުއެވެ.އެއަށްފަހު ރަމަޟާން މަހުގެ ފަހު 10 އަކަށް ސަރުކާރު ބަންދުކުރުމާ ގުޅިގެން މަޖިލީހުގެ ޖަލްސާތައްވެސް މެދުކަނޑާލިއެވެ.
މަޖިލިސް އިދާރާއިން ބުނީ ޖަލްސާތައް މެދުކެނޑުމަކަށްފަހު އަންނަ ހަފުތާގައި ފަށާނެ ކަމަށެވެ. އެގޮތުން، މަޖިލީހުގެ މި އަހަރުގެ ފުރަތަމަ ދައުރުގެ 6ވަނަ ޖަލްސާ އަންނަ ހޯމަ ދުވަހު ބޭއްވުމަށް ނިންމާފައިވާ ކަމަށް އެ އިދާރާއިން ބުންޏެވެ. ނަމަވެސް އަންނަ ހަފްތާގައި ފަށާ ޖަލްސާތަކުގައި ކުރާ މަސައްކަތްތަކެއް ހާމަ ނުކުރެއެވެ.
ރައްޔިތުންގެ މަޖިލީހުގެ މި ހިނގާ ދައުރުގައި ސަރުކާރުގެ ފަރާތުން ގިނަ ބިލުތަކެއް ހުށަހެޅުއްވުމަށް ވަނީ ނިންމާފައެވެ. އޭގެ ތެރޭގައި މަރުގެ އަދަބު ދިނުމާ ގުޅޭ ބިލަކާއި ރައްޔިތުންގެ މަޖިލީހުގެ މެންބަރުންނާއި ކައުންސިލަރުންގެ އިތުބާރުނެތް ކަމުގެ ވޯޓު ނެގުމާ ގުޅޭ އިސްލާހެއް ހުށަހަޅުއްވާނެ ކަމަށް ރައީސުލްޖުމްޙޫރިއްޔާ ޑރ. މުޙައްމަދު މުޢިއްޒު ވަނީ ވިދާޅުވެފައެވެ.
މަޖިލީހުގެ ޖަލްސާތައް ކުރިއަށްދާނީ ކޮންމެ އަހަރަކުވެސް 3 ދައުރަކަށް ބަހާލައިގެންނެވެ. ފުރަތަމަ ދައުރު މެއި މަހުގެ 15 ވަނަ ދުވަހާ ހަމައަށް ކުރިއަށްދާނެއެވެ. މި ދައުރު ދަންމާލެވޭނީ މަޖިލީހުގެ މެޖޯރިޓީ މެންބަރުންގެ ވޯޓުންނެވެ.
ކިޔުންތެރިންގެ ހިޔާލު