މީގެ 14 އަހަރުކުރިން ކ. ކާށިދޫގައި ޕޮލިސް ސާޖަންޓް އާދަމް ހަލީމަށް ވަޅިން ހަމަލާދީ މަރާލިކަމުގެ ކުށް ސާބިތުވި އެރަށު ސުވާސާގެ މުޙައްމަދު ސަމާހު މެރުމަށް ކްރިމިނަލް ކޯޓުން އަނެއްކާވެސް ހުކުމްކޮށްފިއެވެ.

ސާޖަންޓް އާދަމް ހަލީމް މަރާލުމުގެ ކުށުގައި ސަމާހުގެ މައްޗަށް މަރުގެ ހުކުމް ފުރަތަމަ އިއްވީ 2013 ވަނަ އަހަރުއެވެ. ސުޕްރީމް ކޯޓާ ހިސާބަށް އެ މައްސަލަ ދިޔުމުން އަލުން މައްސަލަ ބަލަން އަންގައި ހުކުމްކުރީއެވެ.

ކްރިމިނަލް ކޯޓުން މިއަދު އިއްވި ހުކުމްގައި ވަނީ ސާޖަންޓް އާދަމް ހަލީމަށް ސަމާހު ވަޅިން ހަމަލާދިން ކަމާއި އޭނާ މަރުވީ ސަމާހު ދިން ހަމަލާގެ ނަތީޖާއެއްގެގޮތުންކަން ހެކީންގެ ހެކިބަހުން އެއްވެސް ޝައްކެއް ނެތް މިންވަރަށް ސާބިތުވެފައިވާ ކަމަށެވެ.

ސާޖަންޓް އާދަމް ހަލީމްގެ ވާރިސުން ކޯޓުގައި ބުނެފައި ވަނީ ސަމާހުގެ ކިބައިން މަރަށް މަރު ހިފަން ބޭނުންވާ ކަމަށެވެ.

އެހެންކަމުން އިސްލާމީ ޝަރީއަތުގައި ކަނޑައަޅާފައިވާ އުސޫލުތަކާއެއްގޮތަށް ސަމާހު މެރުމަށް ކްރިމިނަލް ކޯޓުން ވަނީ ހުކުމްކޮށްފައެވެ.