މާލެ ސަރަހައްދުގައި ސަރުކާރުގެ ޓެކްސީ ލައިންގެ ހިދުމަތުގައި މަސައްކަތްކުރަން ބޭނުންވާ ޕާޓްޓައިމް ޑްރައިވަރުންގެ ޕޫލްގައި ރަޖިސްޓްރީވުމަށް ހުޅުވާލައިފިއެވެ.
މާލޭ ސަރަހައްދުގައި ސަރުކާރުގެ ޓެކްސީ ލައިންގެ ހިދުމަތް ފަށަން އެމްޓީސީސީން ޓްރާންސްޕޯޓް މިނިސްޓްރީއާއެކު އެމްޔޫއޯއެއްގައި ސޮއިކުރީ ފެބްރުއަރީ 15، 2025 ގައެވެ.
އެމްޓީސީސީން މިއަދު ބުނީ މާލޭ ޓެކްސީ ލައިން ހިދުމަތާ ގުޅުމަށް ބޭނުންވާ ޕާޓްޓައިމް ޑްރައިވަރުންނަށް ޕޯޓަލް މެދުވެރިކޮށް ޕާޓް ޓައިމް ޑްރައިވަރުންގެ ޕޫލްގައި ރަޖިސްޓްރީވެވޭނެ ކަމަށެވެ.
އާންމު ދަތުރުފަތުރުގައި މިހާރު ދިމާވާ ދަތިތައް ހައްލުކުރަން ސަރުކާރުން ފަށަން ނިންމާފައިވާ ޓެކްސީ ލައިނުގެ ހިދުމަތް ދެނީ އެޕްލިކޭޝަނަކުން ޓެކްސީއަށް އެދޭ ގޮތަށެވެ. އެ ހިދުމަތް 24 ގަޑިއިރު ލިބޭނެ ކަމަށް އެމްޓީސީސީން ބުންޏެވެ.
މިދިޔަ އަހަރުގެ ނޮވެމްބަރުގައި ވެސް ވަނީ ޓެކްސީ ލައިނުގައި މަސައްކަތްކުރާނެ ޑްރައިވަރުން ހޯދަން އިއުލާނުކޮށްފައެވެ. އެ ހިދުމަތަށް 407 ޑްރައިވަރުން ބޭނުންވާ ކަމަށް އޭރު ކުރި އިއުލާނުގައިވެއެވެ. އަދި އޭގެ ތެރެއިން 122 ޑްރައިވަރުން ހޯދީ ޕާޓް ޓައިމްކޮށް މަސައްކަތްކުރާ ގޮތަށެވެ.
ނަމަވެސް އެފަހަރު ކުރިމަތިލީ 366 ފަރާތެކެވެ. އެއީ ފުލް ޓައިމްކޮށް މަސައްކަތް ކުރުމަށް 188 އެޕްލިކޭޝަނަކާއި ޕާޓް ޓައިމްކޮށް މަސައްކަތްކުރަން ހުށަހެޅި 178 އެޕްލިކޭޝަނެކެވެ. އޭގެ ފަހުން ވަނީ ޑްރައިވަރުން ހޯދުމަށް ވޯކިން-އިންޓަވިއުއެއް ކުރިއަށް ގެންގޮސްފައެވެ.
ސަރުކާރުގެ ޓެކްސީލައިނުގެ ހޮޓްލައިން ނަންބަރު އިއްޔެ ވަނީ އިއުލާނުކޮށްފައެވެ. އެއީ 1655 އެވެ. ސަރުކާރުން ޓެކްސީގެ ހިދުމަތް ދޭނީ އިލެކްޓްރިކް ވެހިކަލް (އީވީ) ބޭނުންކޮށްގެންނެވެ. މި ހިދުމަތް ދޭން ހަމަޖެހިފައިވަނީ ހިދުމަތް ދިނުމަށް ހާއްސަ އެޕްލިކޭޝަނެއް ގާއިމުކޮށް، ރާއްޖެއިން ބޭރު ގައުމުތަކުގައި ދޭ އޫބާ އާއި ގްރޭބް ފަދަ ހިދުމަތްތަކާ އެއްގޮތަށެވެ.
ކިޔުންތެރިންގެ ހިޔާލު