މަސްވެރިންގެ ދަފްތަރުގައި ރަޖިސްޓްރީވެފައިވާ 89 މަސްވެރިއަކަށް ބީއެމްއެލްއިން ލޯނު ދޫކޮށްފައިވާކަމަށް މަސްވެރިކަމާ ކަނޑުގެ ވަޞީލަތްތަކާ ބެހޭ ވުޒާރާއިން ވިދާޅުވެއްޖެއެވެ.

މަސްވެރިކަމާ ބެހޭ ވުޒާރާއިން ވިދާޅުވީ، މިއީ 1 މެއި 2025 އިން ފެށިގެން ދަފްތަރުގައި ރަޖިސްޓްރީކޮށްފައިވާ މަސްވެރިންނަށް ދޫކޮށްފައިވާ ލޯނު ކަމަށެވެ.

މަސްވެރިކަމުގެ ޤައުމީ ދަފުތަރުގައި ރަޖިސްޓްރީވެފައިވާ ފަރާތްތަކުގެ ތެރެއިން 89 މަސްވެރިއަކަށް ލޯނު ދޫކޮށްފައިވާއިރު، މި ލޯނުތައް ދޫކުރަމުން ދަނީ ބޭންކް އޮފް މޯލްޑިވްސް (ބީއެމްއެލް) ގެ މަސްވެރިޔާ ޕޯޓަލް މެދުވެރިކޮށްކަމަށް މަސްވެރިކަމާ ބެހޭ ވުޒާރާއިން މަޢުލޫމާތުދެއެވެ. މި ޕޯޓަލްއަކީ، މަސްވެރިންގެ ޤައުމީ ދަފްތަރުގައި ރަޖިސްޓަރީކޮށްފައިވާ މަސްވެރިންގެ ތެރެއިން ޝަރުތު ހަމަވާ ފަރާތްތަކުގެ ދިރިއުޅުމާއި، އުންމީދުތައް ހާސިލްކުރުމަށް އެހީތެރިވުމަށްޓަކައި ބީއެމްއެލްއިން ދޫކުރާ އިސްލާމިކް ފައިނޭންސިންގެ ގިނަ ޕްރޮޑަކްޓުތަކަށް ފަސޭހައިން އެދި ހުށައެޅޭ ގޮތަށް ޑިޒައިންކޮށްފައިވާ ޑިޖިޓަލް ޕްލެޓްފޯމެކެވެ.

މި ޕޯޓަލް މެދުވެރިކޮށް ގެދޮރު ގަތުމަށާއި، ގެދޮރު އިމާރާތް ކުރުމަށާއި، އަދި އެނޫންވެސް އެހެނިހެން ކަންކަމަށް ލޯނަށް އެދެވޭއިރު، މި އިންތިޒާމުގެ ދަށުން ޝަރުތު ހަމަވާ މަސްވެރިންނަށް ރަހުނަކާ ނުލައި އަދި އިކުއިޓީ ނުވަތަ އަމިއްލައަށް ޚަރަދު ކުރަންޖެހޭ ފައިސާއާ ނުލައި 300،000 ރުފިޔާއާ ހަމައަށް ޕަރސަނަލް ފައިނޭންސިންގ ނެގޭގޮތަށް ވަނީ ހަމަޖެހިފައެވެ. ހަމަ އެހެންމެ، ލޯނަށް އަނބުރާ ފައިސާ ދެއްކުމަށް ލުއިފަސޭހަ ގޮތްތަކެއްވެސް ބީއެމްއެލުން ވަނީ ހަމަޖައްސަވައިދެއްވާފަ އެވެ.

ދިވެހިރާއްޖޭގެ މަސްވެރިކަމުގެ ސިނާޢަތް ކުރިއެރުވުމަށް މި ސަރުކާރުން ގިނަ މަސައްކަތްތަކެއް ކުރާއިރު، މިއީ ރާއްޖެއަށް އެންމެ ބޮޑު އާމްދަނީއެއް ލިބޭ އެއް ސިނާޢަތްކަމަށް ހެދުމަކީ އަދުގެ ސަރުކާރުގެ މުހިންމު އަމާޒެކެވެ.