މާލޭގެ ޒިކުރާ މިސްކިތުގެ ބިމުގައި ހަދާފައިވާ ވަގުތީ އިމާރާތް ތަޅާލައި އެ ބިމުގައި އަޅާ ޒަމާނީ ފެންވަރުގެ މިސްކިތުގެ ބިންގާ މި ރަމަޟާން މަހުގެ 27 ވިލޭރޭ އެޅުމަށް ނިންމާފައިވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ މިއަދު ވިދާޅުވެއްޖެއެވެ.
ޒިކުރާ މިސްކިތް ހުރި ބިމުގައި ވަގުތީ މިސްކިތެއް ހުޅުވައި ބޭނުން ކުރަން ފެށީ 2021 ވަނަ އަހަރުއެވެ. އެ މިސްކިތް ހުރި ސަރަހައްދަކީ ގިނަ އަދަދެއްގެ މީހުން ދިރިއުޅޭ ސަރަހައްދެކެވެ. އެ މިސްކިތުގައި ގިނަ ބަޔަކަށް ނަމާދު ކުރެވޭނެ އެކަށީގެންވާ ޖާގައެއް ނެތެވެ.
ޝަހީމް ވިދާޅުވީ އެ ބިމުގައި މިސްކިތެއް އެޅުމަށްޓަކައި މި ރޯދަ މަހުގެ 27 ވިލޭރޭ ބިންގާ އަޅުމަށް މިސްކިތް އެޅުމަށް އެހީދިން މީހުން އެދިފައިވާ ކަމަށެވެ.
ރޯދަ މަސް ނިމުމުން ވަގުތީ މިސްކިތް ތަޅާލުމުގެ މަސައްކަތް ފެށުމަށް ނިންމާފައިވާ ކަމަށް ވެސް ޝަހީމް ވިދާޅުވިއެވެ.
ޒިކުރާ މިސްކިތް 10 ބުރިއަށް އިމާރާތްކުރަން އެސްޖޭ ކޮންސްޓްރަކްޝަނާ 2018 ވަނަ އަހަރު މަސައްކަތް ހަވާލުކުރިއެވެ. އެ މިސްކިތް އެޅުމަށް އެޑްވާންސް ޕޭމަންޓުގެ ގޮތުގައި އެތައް މިލިއަން ރުފިޔާ ދިންނަމަވެސް މިސްކިތް އަޅާފައެއްނުވެއެވެ. އެހެންވެ، އެ ފައިސާ ހޯދަން މިދިޔަ ސަރުކާރުން ކޯޓަށް ދިޔުމުން އެސްޖޭގެ އެދުމުގެމަތިން ކޯޓުން ބޭރުން ވަނީ މައްސަލަ ހައްލުކޮށްފައެވެ.
މައްސަލަ ހައްލުކުރީ އެ ފައިސާ ދިނުމުގެ ބަދަލުގައި ހުޅުމާލޭގެ ދެވަނަ ފިޔަވަހީގައި މިސްކިތެއް އެޅުމަށް އެއްބަސްވެގެންނެވެ. ނަމަވެސް ހުޅުމާލޭގައި އިމާރާތްކުރަން ފެށި މިސްކިތުގެ މަސައްކަތް އެސްޖޭއިން ހުއްޓާލިތާ އެތައް އަހަރެއް ވެއްޖެއެވެ.
އޭގެފަހުން މި ސަރުކާރުން ވަނީ އެސްޖޭގެ އަމިއްލަ ހަރަދުގައި ޒިކުރާ މިސްކިތް އެޅުމަށް އެ ކުންފުންޏާ ހަވާލުކޮށްފައެވެ. ނަމަވެސް އެކަން ވެސް އެ ކުންފުންޏަށް ނުވިއެވެ.
އެހެންވެ އެހެންވެ ހެޔޮއެދޭ ފަރާތެއްގެ ދީލަތި އެހީގައި ޒިކުރާ މިސްކިތް އިމާރާތްކުރަން މިހާރު ހުރިހާ އިންތިޒާމެއް ވަނީ ހަމަޖައްސާފައެވެ.
ކިޔުންތެރިންގެ ހިޔާލު