މޯލްޑިވިއަންގެ ފަސިންޖަރުންގެ ތެރެއިން، އިންޑިއާގެ ޓްރިވަންޑްރަމްގައި ހުންނަ އަނަންތަޕޫރީ ހޮސްޕިޓަލްސް އެންޑް ރިސާޗް އިންސްޓިޓިއުޓުން ޑޮކްޓަރަށް ދައްކާ މީހުންނަށް ޑިސްކައުންޓް ލިބޭ ގޮތަށް އެމްއޯޔޫއެއްގައި ސޮއިކޮށްފިއެވެ.
ޓްރިވަންޑްރަމަކީ މިހާރު ވެސް ގިނަ އަދަދަކަށް ދިވެހިން ބޭސް ފަރުވާއަށް ދާ ތަނެކެވެ.
މޯލްޑިވިއަނުން އެއްބަސްވުން ހެދި އަނަންތަޕޫރީ ހޮސްޕިޓަލަކީ މަލްޓި ސްޕެޝަލިޓީ ހޮސްޕިޓަލެކެވެ.
މޯލްޑިވިއަނުން ނެރުނު ބަޔާނެއްގައި ބުނެފައި ވަނީ މި އެމްއޯޔޫގެ ބޭނުމަކީ ފަސޭހައިން ސިއްހީ އެހީތެރިކަން ލިބޭނެ މަގު ތަނަވަސްކޮށް ދިނުމުގެ އިތުރުން ދިވެހި ފަސިންޖަރުންނަށް ސިއްހީ އެހީ ހޯދުމުގައި އިތުރު ފައިދާތައް ލިބޭނެ ގޮތް ހެދުން ކަމަށެވެ.
ޓްރިވަންޑްރަމަކީ ޒަމާނީ ސިއްހީ ވަސީލަތްތައް ހުންނަ އަދި ގިނަ އަދަދަކަށް ދިވެހިން ފަރުވާ ހޯދުމަށް ދާ ސަރަހައްދީ ސިއްހީ ހަބެއް ކަމަށްވާތީ، މޯލްޑިވިއަންގައި ޓްރިވަންޑްރަމަށް ދަތުރުކުރާ ފަސިންޖަރުންނަށް މި އެމްއޯޔޫގެ ސަބަބުން ފައިދާތަކެއް ލިބޭނެ ކަމަށް އެ އެއާލައިނުން ބުންޏެވެ.
އަނަންތަޕޫރީ ހޮސްޕިޓަލާ އެކު ސޮއިކުރި އެމްއޯޔޫގެ ދަށުން، އެތަނަށް ފަރުވާއަށްދާ އައުޓްޕޭޝަންޓުންނާއި އިންޕޭޝަންޓުންނަށް ވެސް ޑިސްކައުންޓުތަކެއް ލިބޭނެއެވެ.
މޯލްޑިވިއަނުން ބުނީ ހެލްތު ޗެކްއަޕް ޕެކޭޖުތަކުން 15 ޕަސެންޓްގެ ޑިސްކައުންޓެއް ލިބޭނެ ކަމަށާއި އައުޓްޕޭޝަންޓް ލެބޯޓްރީ އާއި ރޭޑިއޮލޮޖީ ހިދުމަތުން 10 ޕަސެންޓްގެ ޑިސްކައުންޓް ލިބޭނެ ކަމަށެވެ.
މީގެ އިތުރުން ޓްރިވަންޑްރަމް އިންޓަނޭޝަނަލް އެއާޕޯޓުން ހޮސްޕިޓަލަށް އެމްބިއުލާންސްގައި ހިލޭ ދަތުރުކޮށްދޭނެ ކަމަށް ވެސް ބުންޏެވެ.
ކިޔުންތެރިންގެ ހިޔާލު