ބަންޑާރަ މިސްކިތް ނުވަތަ މަސްޖިދުއްސުލްތާން މުހައްމަދު ޝަމްސުއްދީން ހުރި ބިމުގައި ޒަމާނީ ބޮޑު މިސްކިތެއް އެޅުމަށް ނިންމާފައިވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ވިދާޅުވެއްޖެއެވެ.

ޝަހީމް ވިދާޅުވީ އެ ތަނުގައި އާ މިސްކިތެއް އެޅުމުގެ މަސައްކަތް ކުރުމަށް ނިންމާފައި ވަނީ ރޯދަމަސް ފަހުން ކަމަށެވެ.

އެ މިސްކިތް އަޅަނީ ހެޔޮއެދޭ ފަރާތެއްގެ ދީލަތި އެހީތެރިކަމާއެކު ކަމަށް ވެސް މިނިސްޓަރު ވިދާޅުވި އެވެ.

އެސްޓީއޯ ސުޕަމާޓާ ޖެހިގެން ހުންނަ ބަންޑާރަ މިސްކިތަކީ ރާއްޖެއަށް އަތްގަދަ ކުރަން އައި ޝީއީންގެ ގަބޫލުކުރުންތަކަށް ހެއްލިފައި ތިބި ވޯރާ ވިޔަފާރިވެރިން ބިނާކުރި މިސްކިތެކެވެ. އޭރު އެ މިސްކިތަށް ކިޔަނީ ބުމްބާ މިސްކިތެވެ. ނަމަވެސް ފަހުން އެ މިސްކިތުގެ ނަން ބަންޑާރަ މިސްކިތަށް ވަނީ ބަދަލުކޮށްފަ އެވެ.

ކުރީގެ ރައީސް އިބްރާހިމް ނާސިރާއި ރައީސް މައުމޫން އަބްދުލްގައްޔޫމްގެ ސަރުކާރުގައި އެ މިސްކިތަށް ވަރަށް ބޮޑެތި ބަދަލުތަކެއް ގެނައެވެ.