މިއަހަރުގެ ރަމަޟާން މަހު ރައްޔިތުންނަށް ރޯދަ ހަދިޔާގެ ގޮތުގައި ސަރުކާރުން ދޭން ނިންމާފައިވާ މަސްދަޅު ކޭސް، 113،382 ގޭބިސީއަށް ދޫކޮށްފިއެވެ.

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި މިކަން ހާމަކުރެއްވީ ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާބެހޭ ވަޒީރު އާދަމް ޝަރީފް އުމަރެވެ. ވަޒީރު ވިދާޅުވީ މިދިޔަ އަހަރާ އަޅާބަލާއިރު މިއަހަރު ރޯދަ ހަދިޔާ ދޫކުރި އަތޮޅުތަކުގެ ގޭބިސީގެ އަދަދު މަދުވި ނަމަވެސް މާލެ ސަރަހައްދުގައި ރޯދަ ހަދިޔާ ދޫކުރި ގޭބިސީތަކުގެ އަދަދު އިތުރުވެފައިވާ ކަމަށެވެ.

ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާބެހޭ ވަޒީރު އާދަމް ޝަރީފް އުމަރު ވިދާޅުވީ، މިދިޔަ ޖެނުއަރީ މަހުގެ 24ވަނަ ދުވަހުން ފެށިގެން މާލެ ސަރަޙައްދުގައި ރޯދަ ހަދިޔާ ބެހުމުގެ މަސައްކަތް ފަށާފައިވާއިރު ބުދަ ދުވަހުގެ ރެއާ ހަމައަށް ހުރިހާ ގޭބިސީއަކަށް ހަދިޔާ ދޫކޮށް ނިމިފައިވާކަމަށެވެ. މިދިޔަ އަހަރެކޭ އެއްގޮތަށް މިއަހަރުވެސް ރޯދަ ހަދިޔާގެ ގޮތުގައި ކޮންމެ ގޭބިސީއަކަށް ރޯދަ ހަދިޔާގެ ގޮތުގައި މަސް ދަޅު ކޭހެއް ދޫކޮށްފައިވާއިރު މާލެ ސަރަހައްދުގައި މިއަހަރު 55،667 ގޭބިސީއަކަށް މަސްދަޅު ކޭސް ދޫކޮށްފައިވާ ކަމަށް ވަޒީރު ވިދާޅުވިއެވެ.

ވަޒީރު ވިދާޅުވި ގޮތުގައި މިއަހަރު އަތޮޅުތަކުގެ ގޭބިސީތަކަށް ބެހުމަށް 57،715 މަސްދަޅު ކޭސް ވަނީ ފޮނުވާފައެވެ. މިއާއެކު މިއަހަރުގެ ރޯދަ ހަދިޔާގެ ގޮތުގައި މުޅި ރާއްޖޭގެ 113،382 ގޭބިސީއަކަށް މަސްދަޅުކޭސް ވަނީ ދޫކޮށްފައެވެ.

ވަޒީރު ވިދާޅުވީ މާލެ ސަރަހައްދުގައި ގޭބިސީތައް ބަލާފައިވަނީ ސްޓެލްކޯގައި ރަޖިސްޓްރީކޮށްފައިވާ ޑޮމެސްޓިކް މީޓަރުތަކަށް ކަމަށެވެ. އަދި އަތޮޅުތަކުގައި ކައުންސިލްތަކުން ފޯރުކޮށްދީފައިވާ އެންމެ ފަހުގެ ރަޖިސްޓްރީތަކަށް ބަލާފައިވާ ކަމަށާއި ގޭބިސީތަކަށް މަސްދަޅު ކޭސް ބެހުމުގައި ލިސްޓުތަކުގެ ސައްޚަކަން ކަށަވަރުކޮށްފައިވާނެ ކަމަށްވެސް ވަޒީރު ވިދާޅުވިއެވެ.

މިދިޔަ އަހަރުގެ ރަމަޟާން މަހު އަތޮޅުތަކުގެ 60،712 ގޭބިސީއަކަށް ވަނީ މަސްދަޅު ކޭސް ދޫކުރިއެވެ. މިއަހަރު އެ އަދަދު މަދުވެފައިވަނީ މާލެއަށް ގިނަބަޔަކު ހިޖުރަކުރުން ކަމުގައި ލަފާކުރެވެއެވެ. އެގޮތުން، މިދިޔަ އަހަރުގެ ރަމަޟާން މަހު މާލޭ ސަރަޙައްދުގެ 50،525 ގޭބިސީއަށް މަސްދަޅު ކޭސް ދޫކޮށްފައިވާއިރު މިއަހަރު ވަނީ 5،142 ގޭބިސީ އިތުރުވެފައެވެ.

މިއީ ރޯދަ ހަދިޔާ ޕްރޮގްރާމް ހިންގާ 3 ވަނަ އަހަރެވެ. މި ދިޔަ އަހަރެކޭ އެއްފަދައިން މި އަހަރުވެސް ސަރުކާރުން ދޫކޮށްފައިވަނީ ދިވެހި ކޮންމެ ޢާއިލާއަކަށް 48 ދަޅުގެ މަސްކޭހެކެވެ.