މި އަހަރުގެ ދޮޅު މަހެއްހާ ދުވަހުގެ ތެރޭގައި 72.2 މިލިއަން ރުފިޔާގެ މަސްތުވާތަކެތި އަތުލައިގެންފައިވާ ކަމަށް ދާހިލީ ސަލާމަތާއި ފަންނިއްޔަތާ ބެހޭ ވަޒީރު އަލީ އިހުސާން ވިދާޅުވެއްޖެއެވެ.

ރައީސް އޮފީހުގައި މިއަދު ބޭއްވެވި ނޫސްވެރިންގެ ބައްދަލުވުމުގައި ވާހަކަދައްކަވަމުން ވަޒީރު ވިދާޅުވީ އެންމެ އިސްކަމެއްދީގެން ކުރަމުންދާ މުހިންމު އެއް މަސައްކަތަކީ ރާއްޖެއަށް އެތެރެކުރާ މަސްތުވާތަކެތި މަދުކުރުން ނުވަތަ ހުއްޓުވުމުގެ މަސައްކަތް ކަމަށެވެ.

އެގޮތުން ފާއިތުވެދިޔަ ދޮޅުމަހެއްހާ ދުވަހުގެ ތެރޭގައި ފުލުހުންނާއި ކަސްޓަމްސްއިން ގުޅިގެން ހިންގި ތަފާތު އޮޕަރޭޝަންތަކުގެ ނަތީޖާއެއް ގޮތުން 83،450 ގްރާމްގެ މަސްތުވާތަކެތި އަތުލައިގެންފައިވާ ކަމަށާއި މިއީ މަގުމަތީގެ އަގުން ނަމަ 72.2 މިލިއަން ރުފިޔާގެ މަސްތުވާތަކެތި ކަމަށް ވަޒީރު ވިދާޅުވިއެވެ.

ވަޒީރު ވިދާޅުވީ އެ މަސްތުވާތަކެތީގެ ތެރެއިން އަށް މައްސަލައެއްގައި ކަސްޓަމްސް އިން ވަނީ 72 ކިލޯގެ މަސްތުވާތަކެތި އަތުލައިގެންފައި ކަމަށެވެ. އެ ތަކެތި އަތުލައިގަތީ އެއްގަމުގެ މަގުންނާއި ވައިގެ މަގުން އެތެރެ ކުރަނިކޮށް އަދި ކަނޑުމަގުން އައިސްފައި ރާއްޖެއަށް އެތެރެކުރަނިކޮށް ކަމަށް ވިދާޅުވިއެވެ. ހަމައެކަނި އެ ތަކެތީގެ އަގަކީ 59 މިލިއަން ރުފިޔާ ކަމަށް ވިދާޅުވިއެވެ.

“އެ މަސްތުވާތަކެތި އަތުލައިގެންފައިވަނީ ފުލުހުންނާއި ކަސްޓަމްސްގެ ވަރަށް ގިނަ މުވައްޒަފުންގެ ވަރަށް ބުރަ މަސައްކަތުން. ވަކިން ހާއްސަކޮށް ކަސްޓަމްސްއިން ބޯޑާ ސެކިއުރިޓީ އިންޓެލް ބެލެހެއްޓުމަށް މިހާރު ގެންގުޅޭ ތަފާތު އެކިއެކި ހުނަރުތައް ބޭނުންކޮށްގެން. އަދި އިންޓެލިޖެންސްގެ އަލީގައި ލިބޭ މުހިންމު މައުލޫމާތުތައް އޮޕަރޭޝަނަލައިޒްކޮށްގެން ކުރެވޭ ބުރަ މަސައްކަތުގެ ނަތީޖާ. އެއާއެކު ދިވެހި ފުލުހުން ރާއްޖޭގެ އެކި ކަންކޮޅުތަކުގައި ރެޔާއި ދުވާލު 24 ގަޑިއިރު ކުރަމުންދާ ބުރަ މަސައްކަތުގެ ނަތީޖާ.” ވަޒީރު އިހުސާން

ފުލުހުން ހިންގި މަސްތުވާތަކެތީގެ އޮޕަރޭޝަނެއްގައި އަތުލައިގަތް މަސްތުވާތަކެތި އަތުރަނީ
ވަޒީރު އިހުސާން ވިދާޅުވީ މި ސަރުކާރުގެ އެންމެ އިސް އަމާޒަކީ ރާއްޖޭގައި އޮތް މަސްތުވާތަކެތީގެ ބޮޑު މައްސަލައަށް ދާއިމީ ހައްލެއް ގެނައުން ކަމަށެވެ. އެގޮތުން ސަޕްލައި ރިޑަކްޝްކުރުމަށް ކުރެވޭ މުހިންމު މަސައްކަތުގައި މިދިޔަ ދޮޅު މަހެއްހާ ދުވަހު ވަނީ ބޮޑެތި ނަތީޖާތަކެއް ހޯދިފައި ކަމަށް ވިދާޅުވިއެވެ.

އިހުސާން ވިދާޅުވީ ފުލުހުންގެ ހިދުމަތް ރާއްޖެއަށް ފުޅާކުރުމަށް ފުލުހުންގެ އިންފްރާސްޓަރްޗާ ޕްރޮޖެކްޓު ކުރިއަށްދާ ކަމަށެވެ. އެ މަޝްރޫއުގެ ދަށުން ވަކިވަކި 153 ފުލުހުންގެ އިންފްރާސްޓަރްޗާގެ މަސައްކަތް ކުރިއަށް ގެންދާ ކަމަށް ވިދާޅުވިއެވެ.

އޭގެ ތެރެއިން ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެން ފަހުން ފެށުނު ދެ ޕްރޮޖެކްޓެއް ނިންމައި އެ ޕޮލިސް ސްޓޭޝަންތައް ވަނީ ހިދުމަތަށް ނެރިފައި ކަމަށާއި މި އަހަރުގެ ފުރަތަމަ ކުއާޓަރުގައި 11 ޕްރޮޖެކްޓެއް ނިންމަ ދިވެހި ފުލުހުން ހިދުމަތަށް ނެރޭނެ ކަމަށް ވިދާޅުވިއެވެ.