ހިޔާ ފްލެޓްތަކާއި، ހުޅުމާލޭގެ އެހެނިހެން ސޯޝަލް ހައުސިން މަޝްރޫއުތަކުގެ ދަށުން ދޫކޮށްފައިވާ ތަންތަން ބޮޑު އަގުގައި ކުއްޔަށް ދޫކުރުން ހުއްޓުވުމަށްޓަކައި ގާނޫނަށް އިސްލާހު ގެނައުމުގެ މަސައްކަތް ފަށައިފައިވާކަމަށް ހައުސިން މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެއެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި މުއްތަލިބު ވިދާޅުވީ، ސޯޝަލް ހައުސިން ފްލެޓްތައް ކުއްޔަށް ދިނުމަކީ އެފަދަ މަޝްރޫއުތައް ހިންގުމުގެ އަސްލު މަގްސަދާ ހިލާފު ކަމެއް ކަމަށެވެ. މުއްތަލިބު ވިދާޅުވީ އެންމެ ފަހުން ހުޅުމާލެއިން ހަވާލުކުރި 4,000 ފްލެޓަކީ “ރެންޓް އޯން” މޮޑެލްގެ ދަށުން ދޫކޮށްފައިވާ ތަންތަނަށް ވާތީ، އެ ތަންތަން ކުއްޔަށް ދޫކުރާ ފަރާތްތަކާ މެދު ފިޔަވަޅު އެޅުން ފަސޭހަވާނެ ކަމަށެވެ.

އެގޮތުން ފަހި ދިރިއުޅުން ކޯޕަރޭޝަން (އެފްޑީސީ)ން އިމާރާތްކޮށްފައިވާ އެ ފްލެޓްތައް ކުއްޔަށްދޭކަން ފާހަގަވެއްޖެ ނަމަ، ޖޫރިމަނާ ކުރުމަށް ފަހު އެކަން އިސްލާހު ކުރަން ފުރުސަތު ދޭނެކަމަށް މިނިސްޓަރު ވިދާޅުވިއެވެ. އަދި އެ މުއްދަތުގައި އިސްލާހު ނުކޮށްފި ނަމަ، ފްލެޓް އަތުލުމުގެ ބާރު ސަރުކާރަށް އޮންނާނެކަމަށް މުއްތަލިބު ވިދާޅުވިއެވެ.

ނަމަވެސް، ހިޔާ ފްލެޓްތަކާއި މީގެ ކުރިން ދޫކޮށްފައިވާ އެހެން ފްލެޓްތަކަކީ “ސޭލްސް އެންޑް ޕާޗޭސް” މޮޑެލްގެ ދަށުން ދީފައިވާ ތަންތަން ކަމަށްވާތީ، އެ ތަންތަނާމެދު ފިޔަވަޅު އެޅުމުގައި ގާނޫނީ ހުރަސްތަކެއް ދިމާވާކަމަށް މުއްތަލިބު ވިދާޅުވިއެވެ.

“ހިޔާ ފްލެޓުގެ އެގްރީމަންޓުގައި ވެސް މިސާލަކަށް މި އިންނަނީ އޭރު ގާނޫނުގައި ކަނޑައަޅާފައިވާ މަނާ ކަމެއް ނުކުރެވޭނެއޭ. އެހެންވެ ގާނޫނުގައި އަޅުގަނޑުމެން ކަނޑައަޅަން މިއުޅެނީ ކުއްޔަށް ދިނުމަކީ (ހިޔާ ފުލެޓް ކުއްޔަށް ދިނުމަކީ) މަނާކަމެކޭ،” މުއްތަލިބު ވިދާޅުވިއެވެ.

މުއްތަލިބު ވިދާޅުވީ ހިޔާ ފްލެޓްތަކުގައި ބައެއް ފަރާތްތަކުން ހިންގަމުންދާ ލޭބާ ކުއާޓާތައް ހުއްޓުވުމަށް މިހާރުވެސް ނޯޓިސްދީ، އެފަދަ ތަންތަން ހުސްކުރުމުގެ މަސައްކަތް ކުރަމުންދާ ކަމަށެވެ.