އުރީދޫ މޯލްޑިވްސްގެ އަހަރީ އާންމު ޖަލްސާ އަންނަ މަހުގެ 4 ވާ ހޯމަ ދުވަހު ބޭއްވުމަށް އެ ކުންފުނިން ނިންމައިފިއެވެ.

އުރީދޫން މައުލޫމާތު ދޭ ގޮތުގައި މި ޖަލްސާ އޮންނާނީ މާޗް 4 ވަނަ ދުވަހުގެ ރޭ 9:30 ގައި ހުޅުމާލޭގައި ހުންނަ އެ ކުންފުނީގެ ހެޑްކުއާޓާސްގައެވެ. މި ޖަލްސާގައި ބައިވެރިވުމަށް ރަޖިސްޓަރީވާ ފަރާތްތަކަށް އޮންލައިންކޮށް ނުވަތަ ޖަލްސާ ބާއްވާ ތަނަށް ހާޒިރުވެގެން ބައިވެރިވުމުގެ ފުރުސަތު ވަނީ ހުޅުވާލާފައެވެ.

އެގޮތުން، ޖަލްސާގައި އޮންލައިންކޮށް ބައިވެރިވާން ބޭނުންވާ ފަރާތްތަކަށް މޯލްޑިވްސް ސެކިއުރިޓީސް ޑިޕޮސިޓަރީ ކޮމްޕެނީ (އެމްއެސްޑީ) ގެ އޮންލައިން މެނޭޖްމަންޓް ސިސްޓަމް ”ފަހިވޯޓު“ މެދުވެރިކޮށް ބައިވެރިވެވޭނެއެވެ. އަދި އުރީދޫ ހެޑްކުއާޓާސްއަށް ހާޒިރުވެގެން ޖަލްސާގައި ބައިވެރިވުމުގެ ފުރުސަތު ދިނުމަށް ހަމަޖެހިފައިވަނީ ރަޖިސްޓަރީވާ ފަރާތްތަކުގެ ތެރެއިން ފުރަތަމަ 128 ހިއްސާދާރުންނަށެވެ.

މި އަހަރުގެ އަހަރީ އާންމު ޖަލްސާގެ އެޖެންޑާގައި މުހިންމު ކަންތައްތަކެއް ވަނީ ހިމަނާފައެވެ. އޭގެ ތެރޭގައި:
ނިމިދިޔަ އަހަރުގެ އޮޑިޓްކޮށްފައިވާ މާލީ ހިސާބުތަކާއި އޮޑިޓަރުންގެ ރިޕޯޓު ފާސްކުރުން.
2025 ވަނަ އަހަރުގެ ކުންފުނީގެ ޑިރެކްޓަރުންގެ ރިޕޯޓު ފާސްކުރުން.
މި އަހަރަށް އޮޑިޓަރުން އައްޔަންކޮށް، އޮޑިޓަރުންގެ އުޖޫރަ ކަނޑައެޅުން.
2025 ވަނަ އަހަރުގެ ޑިވިޑެންޑުގެ ގޮތުގައި ބަހާނެ ފައިސާ ކަނޑައަޅައި ފާސްކުރުން.
ޑިރެކްޓަރުންގެ ބޯޑަށް ޑިރެކްޓަރުން އަލުން އިންތިހާބުކުރުން.
އުރީދޫ މޯލްޑިވްސް އަކީ ރާއްޖޭގައި ފުޅާދާއިރާއެއްގައި މުވާސަލާތީ ހިދުމަތް ދެމުން އަންނަ ކުންފުންޏަކަށް ވާއިރު، ކޮންމެ އަހަރަކު ބާއްވާ މި ޖަލްސާއަކީ ކުންފުނީގެ ހިއްސާދާރުންނަށް ކުންފުނީގެ ކުރިމަގާއި މާލީ ހާލަތާ ގުޅޭގޮތުން މުހިންމު ނިންމުންތައް ނިންމުމުގައި ބައިވެރިވުމަށް ލިބޭ މުހިންމު ފުރުސަތެކެވެ.