ރާއްޖޭގައި އޭލެވެލް އިމްތިހާނު “ރީސިޓް” ހަދަން ބޭނުންވާ ދަރިވަރުންނަށް، މެއި/ޖޫންގައި އެ ފުރުސަތު ފަހިކޮށްދިނުމަށް އެދި ދަރިވަރުންތަކެއް ސޯޝަލް މީޑިއާގައި ކެމްޕޭނެއް ފަށައި، ޕެޓިޝަނެއް ހުށަހަޅައިފިއެވެ. “މޭކް ލޯކަލް ރީސިޓްސް ޕޮސިބަލް” ގެ ނަމުގައި އިންސްޓަގްރާމްގައި ހިންގާ މި ހަރަކާތުގައި މިހާތަނަށް 600 އަށްވުރެ ގިނަ ދަރިވަރުން ވަނީ ސޮއިކޮށްފައެވެ.

މިހާރު ރާއްޖޭގައި އޭލެވެލް އިމްތިހާނު ބާއްވަނީ ހަމައެކަނި އޮކްޓޯބަރ/ނޮވެންބަރު މަހުއެވެ. އެހެންކަމުން ގްރޭޑް 11 ގެ “އޭއެސް” އިމްތިހާނުން ދަށްވާ ދަރިވަރުން ރީސިޓް ހަދަން މަޖުބޫރުވަނީ ޖެހިގެން އަންނަ އަހަރުގެ އޮކްޓޯބަރު މަހު، ގްރޭޑް 12 ގެ ފައިނަލް (އޭ2) އިމްތިހާނުތަކާ އެކުގައެވެ. މިކަމުގެ ސަބަބުން ދަރިވަރުންނަށް އެއްފަހަރާ ގިނަ ކަރުދާސްތަކެއް ހަދަންޖެހި، ނަފްސާނީ ގޮތުންނާއި ތައުލީމީ ގޮތުން ބޮޑެތި ގޮންޖެހުންތަކާ ކުރިމަތިލާން ޖެހެއެވެ.

ރާއްޖޭގެ ސްކޫލްތަކުގައި ކިޔަވައިދޭ އެޑެކްސެލް މުގައްރަރުގެ އިމްތިހާނުތައް އިނގިރޭސިވިލާތާއި އެހެނިހެން ޤައުމުތަކުގައި މެއި/ޖޫން ގައި ބާއްވައެވެ. ނަމަވެސް ރާއްޖޭގައި މި އިންތިޒާމު ނެތުމުން، ގިނަ ދަރިވަރުން ބޮޑު ހަރަދުކޮށްގެން ރާއްޖެއިން ބޭރަށް ގޮސް އިމްތިހާނު ހަދަން މަޖުބޫރުވެއެވެ. ދަރިވަރުން ފާހަގަކުރާ ގޮތުގައި މިއީ އާއިލާތަކަށް އުފުލަންޖެހޭ ބޮޑު މާލީ ބުރައެކެވެ. އަދި މެއި/ޖޫން އަކީ ސްކޫލްގެ ކިޔެވުން ކުރިއަށްދާ ދުވަސްވަރަކަށްވާތީ، ރާއްޖެއިން ބޭރަށް ދަތުރުކުރުމުން މުހިންމު ފިލާވަޅުތައް ގެއްލި، ކިޔެވުމަށް ނޭދެވޭ އަސަރު ކުރެއެވެ.

މި ޕެޓިޝަން އިންތިޒާމުކުރާ ފަރާތްތަކުން ވަނީ، މެއި/ޖޫން ގައި ރާއްޖޭގައި ރީސިޓް އިމްތިހާނުތައް ބޭއްވޭނެ އިންތިޒާމު ހަމަޖައްސައިދިނުމަށް އެޑިއުކޭޝަން މިނިސްޓްރީއަށާއި ޑިޕާޓްމަންޓް އޮފް ޕަބްލިކް އެގްޒެމިނޭޝަންސް (ޑީޕީއީ) އަށް ގޮވާލާފައެވެ. މި ބަދަލު ގެނެސްދީފިނަމަ ދަރިވަރުންގެ ސްޓްރެސް ކުޑަވެ، ސްޓޭބަލް މާހައުލެއްގައި އިމްތިހާނަށް ތައްޔާރުވުމުގެ ފުރުސަތު ލިބިގެންދާނެ ކަމަށް އެފަރާތްތަކުން ބުނެއެވެ.