ބިންވެރިޔާ ސްކީމްގެ ދަށުން ގިރާވަރުފަޅުން ގޯތި ލިބުނު ފަރާތްތަކަށް އަލުން ގޯތި ދޫކުރުމަށް ބާއްވާ ގުރު ނެގުން އަންނަ ހޮނިހިރު ދުވަހު ބާއްވަން ނިންމައިފިއެވެ.

ހައުސިން މިނިސްޓްރީން މިރޭ ނެރުނު ނޫސް ބަޔާނެއްގައި ބުނީ ގިރާވަރުފަޅުގެ ލޭންޑް ޔޫސް ޕްލޭނަށް ބަދަލު ގެނެސްފައިވާތީ އެތަނުން ގޯތި ލިބުނު ފަރާތްތަކަށް ކަނޑައަޅާފައިވާ ބިމުގެ ސަރަހައްދަށް ބަދަލު އައިސްފައިވާތީ އަލުން އާ ލޮޓްތަކެއް މިހާރު ކަނޑައަޅާފައިވާ ކަމަށެވެ.

އެހެންވެ ގިރާވަރުފަޅުން ގޯތި ލިބުނު ފަރާތްތަކަށް އާ ޕްލޮޓް އެލޮކޭޓް ކުރަން ނިންމައި އެކަން އަންނަ ހޮނިހިރު ދުވަހު ހެނދުނު 9:30 ގައި ސޯޝަލް ސެންޓަރުގައި އޮންނާނެ ކަމަށެވެ.

ގިރާވަރުފަޅުން ދޫކުރާ ގޯތީގެ އަދަދާއި ގޯތީގެ ބޮޑުމިން:

1250 އަކަފޫޓުގެ 2603 ގޯތި
1650 އަކަފޫޓުގެ 1214 ގޯތި
2050 އަކަފޫޓުގެ 254 ގޯތި
2450 އަކަފޫޓުގެ 1 ގޯތި
ހައުސިން މިނިސްޓްރީން ބުނީ ގުރުނެގުމުގެ ކަންތައްތައް ކުރިއަށް ގެންދާނީ އެ މިނިސްޓްރީގެ މުވައްޒަފުން ކަމަށެވެ. ގުރުއަތުލާ ހޯލަށް ވަދެވޭނީ ކޮންމެ ޕްލޮޓަކުންވެސް އެއް ފަރާތަށް ކަމަށެވެ. އަދި ގޯތި ލިބޭ ފަރާތެއްގެ ބަދަލުގައި އެހެން މީހަކު ފޮނުވާނަމަ އެކަން އަންގައިދޭ ލިޔުމާއި، ގޯތީގެ ވެރިފަރާތުގެ އައިޑީ ކާޑުގެ ކޮޕީއަކާއި ބަދަލުގައި ހާޒިރުވާ މީހާގެ އައިޑީކާޑުގެ ކޮޕީއެއް ބޭނުންވާނެ ކަމަށެވެ.

އަދި އޭގެ އިތުރުން ގުރުނެގުން ކުރިއަށް ގެންދާއިރު ގޯތި ލިބޭ ފަރާތަށް ގުރުއަތުން ލިބޭ ޕްލޮޓް ހިޔާވެހި ޕޯޓަލް އިން ވަގުތުން ފެންނަން ހުންނާނެ ކަމަށެވެ. އަދި އޭގެއިތުރުން އެސްއެމްއެސް މެދުވެރިކޮށްވެސް ޕްލޮޓް ނަމްބަރު އަންގާނެ ކަމަށެވެ.

ހައުސިން މިނިސްޓްރީން ބުނީ ގުރުއަތުލާ ނިމުމުން ގޯތިތަކުގެ ރަޖިސްޓްރީ އާއި ބިން ލިބޭ ފަރާތްތަކާއެކު ހަދާ އެއްބަސްވުންތަކާ ގުޅޭ މައުލޫމާތު ހިއްސާކުރާނެ ކަމަށެވެ. އަދި ބިން ހިއްކައި ނިމުމުން ގޯތިތައް ހަވާލުކުރާނެ ކަމަށެވެ.

މިމަސް ނިމުމުގެ ކުރިން ގިރާވަރުފަޅު ހިއްކަން ފަށާނެ ކަމަށް ހައުސިން މިނިސްޓަރު ޑރ. އަބްދުﷲ މުއްތަލިބު ވަނީ ވިދާޅުވެފައެވެ.