ހުރިހާ ދަރިވަރުންނަކީ ވެސް ފަތިސްނަމާދުން ދުވަސް ފަށާ ކުދިންނަށް ވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު އިލްތިމާސް ކުރައްވައިފިއެވެ. ރައީސް މިކަމަށް އިލްތިމާސްކުރެއްވީ ހުޅުމާލެ ފޭސް 2 ގައި އަލަށް އިމާރާތްކުރި ޝަހީދު އަލީ ސްކޫލް ހުޅުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.

“ފަރުޟް ފަސް ނަމާދު އަދާކުރުމަށް ހުރިހާ ލޮބުވެތި ދަރިވަރުންނަށް އަޅުގަނޑު ވަރަށް ބޮޑަށް އިލްތިމާސްކުރަން. ވަގުތުން ވަގުތަށް ނަމާދުކުރުމަށް، ފަތިސްނަމާދަށް ގަޑިއަށް ހޭލުމަށް، ހޭލައި ފަތިސްނަމާދުކޮށްގެން ދުވަސް ފެށުމަށް، ހުރިހާ ކުދިން ވެސް އަޒުމް ކަނޑައަޅަން އަޅުގަނޑު ރާއްޖޭގެ ހުރިހާ ކިޔަވާކުދިންނަށް އިލްތިމާސްކުރަން،” ރައީސް

ރައީސް ވިދާޅުވީ ދަރިވަރުންނަކީ އިސްލާމްދީނުގައި އޮންނަ ގޮތަށް ކަންކަން ތަރުތީބުކޮށްގެން ކޮންމެ ދުވަހެއް ވެސް ހޭދަކުރާ ބަޔަކަށް ވާންޖެހޭ ކަމަށެވެ. އަދި ފަރުޟް ފަސް ނަމާދު އޭގެ ވަގުތުގައި އަދާކުރުމަށް ރާއްޖޭގެ ހުރިހާ ދަރިވަރުންނަށް އެމަނިކުފާނު ވަރަށް ބޮޑަށް ބާރުއެޅުއްވިއެވެ.

ދަރިވަރުން ދުވަސް ފަށަނީ ފަތިސްނަމާދުންކަން ކަށަވަރުކުރުމަކީ ބެލެނިވެރިންގެ ޒިންމާއެއް ކަމަށް ދެކިގެން އެކަން ކަށަވަރުކުރުމަށް ވެސް ރައީސް ގޮވައިލެއްވިއެވެ. އެމަނިކުފާނު ވިދާޅުވީ ދީނުގެ ކަންކަމަކީ ހަމައެކަނި ފޮތްތަކުގައި ލިޔެފައި ހުންނަންޖެހޭ ކަންކަން ނޫން ކަމަށާއި، އެއީ އަމަލީ ގޮތުން ކޮންމެ ދުވަހަކު ތަންފީޒުކުރަންޖެހޭ ކަންކަން ކަމަށެވެ.

ސްކޫލްތަކުގެ ތަރުތީބުވެސް ހުންނަންވާނީ ދަރިވަރުން ދުވަހުގެ ބޭނުން އެންމެ ހެޔޮގޮތުގައި ހިފާ ގޮތަށް ކަމަށް ރައީސް ފާހަގަކުރެއްވިއެވެ.

މީގެ އިތުރުން، ދަރިވަރުންނަކީ މައިންބަފައިންނަށް ކިޔަމަންތެރިވާ، ޓީޗަރުންނާއި ސްކޫލްގެ ވެރިންގެ ބަސްއަހާ ކުދިންނަށް ވާންޖެހޭނެ ކަމަށް ރައީސް ވިދާޅުވި އެވެ. ދަރިވަރުންގެ ދިރިއުޅުން މިގޮތަށް ބައްޓަންކޮށްފި ނަމަ، އެ އެޅެނީ ގުޑުވާނުލެވޭ ފަދަ ވަރުގަދަ ބިންގަލެއް ކަމަށް ވެސް ރައީސް ޑރ. މުއިއްޒު ވިދާޅުވިއެވެ.