ވަތަނީ ހިދުމަތުގެ ދަރިވަރުންނަކީ އުފެއްދުންތެރި އަދި ޒިންމާދާރު ބަޔަކަށް ހެދުމަށް ވަރަށް ބޮޑު އިސްކަމެއް ދެވޭނެ ކަމަށާއި ވަތަނީ ހިދުމަތް ޕްރޮގްރާމްގެ ދަރިވަރުންނަކީ، ދިރިއުޅުމުގެ މައިދާނުގައި ބޭނުންވާ ހުނަރުތައް ދަސްވެފައިވާ ބަޔަކަށް ވެގެންދާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.

ސަރުކާރުން ފަށާފައިވާ “ދިވެހި ވަތަނީ ހިދުމަތް” ޕްރޮގްރާމްގެ ދެ ވަނަ ބުރުގައި ބައިވެރިވި ޒުވާނުން ތަމްރީނުތައް ފުރިހަމަކުރުމަށްޓަކައި މިއަދު ވަނީ ޅ. މާފިލާފުއްޓަށް ފުރައިފިއެވެ.

ޒުވާނުންނަށް ފަހި މުސްތަގުބަލެއް ހޯދައިދިނުމުގެ މަގުސަދުގައި ފެށި މި ޕްރޮގްރާމްގެ ދެ ވަނަ ބުރުގައި ޖުމްލަ 350 ޒުވާނުން ބައިވެރިވެފައިވެއެވެ.

ރައީސް ޑރ. މުހައްމަދު މުއިއްޒު އެކްސްގައި މިއަދު ކުރެއްވި ޕޯސްޓެއްގައި ވިދާޅުވީ، އެ ތަމްރީން ޕްރޮގްރާމަކީ ދިވެހި ގައުމިއްޔަތާއި ޒިންމާދާރު ރައްޔިތުކަމާއި ދީނީ ތަރުބިއްޔަތާއި ލީޑަޝިޕާއި ފަސްޓްއެއިޑާއި ފަޔާފައިޓިން އާއި ހަށިހެޔޮކަމާއި ފެތުމާއި މޫދަށް އަހުލުވެރި ކުރުވުމާއި ފީލްޑް އެކްޓިވިޓީތަކުގެ އިތުރުން ޝައުގުވެރި އަދި ބޭނުންތެރި ތަފާތު އެހެނިހެން އެތައް ހަރަކާތްތަކެއް އެކުލެވޭގޮތަށް ކުރިއަށް ގެންދާ ޕްރޮގްރާމެއް ކަމަށެވެ.

“ތަމްރީނުގެ މުއްދަތުގައި، މި ޒުވާނުންގެ ހިތްތަކުގައި ދީނުގެ ރުކުންތަކަށާއި އިސްލާމީ ޝިއާރުތަކަށް ލޯބި އިތުރުކޮށް، މި ޒުވާނުންނަކީ ގައުމިއްޔަތުގެ ރޫހާއި ފަހުރު ދިރުވާ އާލާކުރުމަށް ޝައުގުވެރިވާ، އަހުލާގާއި ސުލޫކު ރަނގަޅު، ދިރިއުޅުމުގެ މައިދާނުގައި ބޭނުންވާ ހުނަރުތައް ދަސްވެފައިވާ އުފެއްދުންތެރި އަދި ޒިންމާދާރު ބަޔަކަށް ހެދުމަށް ވަރަށް ބޮޑު އިސްކަމެއް ދެވޭނެ،” ރައީސް ވިދާޅުވިއެވެ.

މީގެ އިތުރުން ރައީސް ވިދާޅުވީ އެ ޕްރޮގްރާމްގެ ބައިވެރިންނަކީ ރޫހާނީ، ނަފްސާނީ އަދި ޖިސްމާނީ ގޮތުން ދުޅަހެޔޮ އަދި ހަށިހެޔޮ ބަޔަކަށް ވެގެންދާނެ ކަމަށެވެ.

ރައީސް ވަނީ ތަމްރީނުގެ ހުރިހާ ބައިވެރިންނަށްވެސް ކާމިޔާބީއަށް އެދިވަޑައިގެންފައެވެ.