ހއ. ދިއްދޫގައި އެއާޕޯޓު ތަރައްގީކުރުމަށާއި އަސާސީ އެހެނިހެން ބޭނުންތަކަށް ބޭނުންވާ ބިން ހިއްކުމުގެ މަޝްރޫއުގެ ދަށުން 20 ދުވަސްތެރޭ 41 ހެކްޓަރުގެ ބިން ހިއްކައި ނިންމާލައިފިއެވެ.

ދިއްދޫގެ ހުޅަނގު ފަރާތް ހިއްކުމުގެ މަޝްރޫއުގެ ދަށުން، އެމްއޭސީއެލުން 110 ހެކްޓަރުގެ ބިމެއް އެ ރަށަށް އިތުރުކުރާނެއެވެ. އެ މަސައްކަތް އެމްއޭސީއެލުން ފެށީ މިމަހުގެ ފަސްވަނަ ދުވަހުއެވެ.

އެމްއޭސީއެލް އިން ބުނީ، ދިއްދޫގައި ބިން ހިއްކުމުގެ މަޝްރޫއުގެ ދަށުން މިހާތަނަށް 41 ހެކްޓަރުގެ ބިން ހިއްކައި، 36.6 ޕަސެންޓުގެ މަސައްކަތް މިހާތަނަށް ނިންމާފައިވާ ކަމަށެވެ.

ދިއްދޫގެ ބިން ހިއްކަނީ ލަގްޒަމްބާގަށް ނިސްބަތްވާ ލީފް އެރިކްސަން ނަމަކަށް ކިޔާ ކޮންނަ ބޯޓު، ނުވަތަ ޑްރެޖަރު ބޭނުންކޮށްގެންނެވެ. އެކާޅީސް މީޓަރު ފުޅާ، 223 މީޓަރު ދިގު މި ޑްރެޖަރުން ދުވާލަކު 46،000 ކޮޑިމީޓަރުގެ ވެލި ނެގުމުގެ ގާބިލުކަން ލިބިގެންވެއެވެ.

ސަރުކާރުގެ އަމާޒަކީ އަންނަ މަހުގެ ނިޔަލަށް ދިއްދޫ ބިން ހިއްކުމުގެ މަސައްކަތް ނިންމުމެވެ. އެއަށްފަހު އެ ރަށުގައި އެއާޕޯޓް ތަރައްގީކުރުމުގެ މަސައްކަތް ފަށާނެއެވެ.