ހދ، އަތޮޅު ކައުންސިލުން މުވައްޒަފުންނަށް ގަވާއިދާ ޚިލާފަށް ދީފައިވާ 172،000 އަށް ވުރެ ގިނަ ރުފިޔާ އަނބުރާ ހޯދަން އޮޑިޓާ ޖެނެރަލް ހުސައިން ނިޔާޒީ އަންގަވައިފިއެވެ.

އޮޑިޓާ ޖެނެރަލް ނެރުއްވާފައިވާ އޮޑިޓް ރިޕޯޓްގައިވާ ގޮތުން ހދ. އަތޮޅު ކައުންސިލުން ފައިސާ ހަރަދުކުރީ ފުވައްމުލައް ސިޓީ އާއި އައްޑޫ ސިޓީއަށް ދަތުރާއި ފ.އަތޮޅާއި ދ. އަތޮޅުގެ ބައެއް ރަށްތަކަށް ދިއުމަށެވެ. އެ ދަތުރުތަކުގައި ބައިވެރިވީ ކައުންސިލް މެންބަރުންނާއި ސެކްރެޓަރީ ޖެނެރަލާއި މުވައްޒަފުން ހިމެނޭހެން ޖުމްލަ 12 ބޭފުޅުންނެވެ.

އެ ރިޕޯޓްފައިވާ ގޮތުން އެ ދަތުރުތަކުގެ ތެރެއިން އެންމެ ބޮޑު ޚަރަދެއް ކޮށްފައި ވަނީ ތިބުމާއި ކެއުމަށެވެ. އެކަމަށް ޖުމްލަ 209،000ރ. ހަރަދުކޮށްފައިވެއެވެ. އެއީ އައްޑޫ ސިޓީ އަަށާއި ފުވައްމުލައް ސިޓީއަށް ކުރި ދަތުރުގައި ހަރަދުކުރި 105،600ރ. އާއި ފ. އަތޮޅަށާއި ދ.އަތޮޅަށް ކުރި ދަތުރުގައި ހަރަދުކުރި 103،400ރ. އެެވެ.

ކުރި ދަތުރުގެ ޓިކެޓަށް ޖުމްލަ 119,462ރ. ހަރަދުކޮށްފައިވާއިރު، އެކަމުން ހާސިލުވި ނަތީޖާއެއް ނެތް ކަމަށް އޮޑިޓް ރިޕޯޓްގައިވެއެވެ.

ގަވައިދާ ހިލާފަށް ހާޒިރީ އެލަވަންސްގެ ގޮތުގައި ދީފައިވަނީ މަސައްކަތުގެ ވަގުތު ނިމެންދެން މަޑުކުރާ ކޮންމެ ދުވަހަކަށް 50.ރ ގެ ރޭޓުންނެވެ. އެގޮތަށް 172،000 އަށް ވުރެ ގިނަ ރުފިޔާ މުވައްޒަފުންނަށް ދީފައިވާ ކަމަށާއި އެއީ އުސޫލުތަކާ ހިލާފަށް ދީފައިވާ ފައިސާ ކަމަށްވާތީ އެ ފައިސާ އެ މުވައްޒަފުންގެ އަތުން ހޯދުމަށް އޮޑިޓާ ޖެނެރަލް ވަނީ އަންގަވާފައެވެ.