އަންނަ އޭޕްރީލް މަހުގެ 4 ވަނަ ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބުގެ ވޯޓު ލިސްޓަށް 315 ޝަކުވާ ލިބިފައިވާކަމަށް އިލެކްޝަންސް ކޮމިޝަން (އީސީ) އިން ބުނެފިއެވެ. މި އިންތިހާބުގައި ވޯޓުލުމުގެ ހައްގު 294،937 މީހަކަށް ލިބިފައިވާއިރު، ހުށަހަޅާފައިވާ ޝަކުވާތަކުގެ ތަފްސީލު އީސީން ހާމަކުރާނީ މި މަހުގެ 18 ވަނަ ދުވަހުއެވެ.

މި އިންތިހާބުގައި ފެނުމުގެ ނުކުޅެދުންތެރިކަން ހުންނަ މީހުންނަށް، އެހެން މީހެއްގެ އެހީތެރިކަމާ ނުލައި ވޯޓުލުމަށް ބޭނުންވާ ޓެމްޕްލޭޓް ބޭނުންކުރުމަށް ރަޖިސްޓްރީވުމުގެ ފުރުސަތުވެސް މިހާރު ވަނީ ހުޅުވާލާފައެވެ. އެގޮތުން ފެބްރުއަރީ 23 ވަނަ ދުވަހުގެ ރޭގަނޑު 10:00 ގެ ކުރިން 1414 އަށް ގުޅައިގެން ނުވަތަ ކަނޑައެޅިފައިވާ ގަޑިތަކުގައި ރަޖިސްޓްރީ ކުރެވޭނެ އިންތިޒާމް ވަނީ ހަމަޖައްސާފައެވެ. މިއީ 2023 ވަނަ އަހަރުން ފެށިގެން، ނުކުޅެދުންތެރިކަން ހުންނަ ފަރާތްތަކަށް ފަސޭހަކަމާއެކު ވޯޓުލުމުގެ ފުރުސަތު ދިނުމަށް ތައާރަފްކޮށްފައިވާ ނިޒާމެކެވެ.

އިންތިހާބުގެ އިންތިޒާމްތަކަށް ބަލާއިރު، މުޅި ރާއްޖެއާއި ރާއްޖެއިން ބޭރުގައި (ލަންކާ އަދި މެލޭޝިއާ) ޖުމްލަ 621 ވޯޓު ފޮށި ބެހެއްޓުމަށް ވަނީ ނިންމާފައެވެ. މީގެ ތެރޭގައި އަތޮޅުތެރޭގައި ބަހައްޓާ 321 ފޮއްޓާއި މާލެ ސަރަހައްދުގައި ބަހައްޓާ 240 ފޮށީގެ އިތުރުން ރިސޯޓްތަކާއި، ސިނާއީ މަސައްކަތްކުރާ ތަންތަނުގެ އިތުރުން ޖަލުތައް ހިމެނެއެވެ. މި އިންތިހާބުގައި 225 ދާއިރާއަކުން ރަށު ކައުންސިލްތަކަށް 626 ކައުންސިލަރުންނާއި ސިޓީ ކައުންސިލްތަކަށް 52 ކައުންސިލަރުން އިންތިހާބު ކުރުމަށް ވަނީ ހަމަޖެހިފައެވެ.