ޓޫރިޒަމް މިނިސްޓްރީގެ އެންމެ ފަހުގެ ތަފާސްހިސާބުތަކުން ދައްކާގޮތުގައި، ހިނގަމުންމިދާ ޖަނަވަރީ މަހުގެ 11 ވަނަ ދުވަހުގެ ނިޔަލަށް ރާއްޖެއަށް 79،004 ފަތުރުވެރިން ވަނީ ޒިޔާރަތްކޮށްފައެވެ. މިއީ ފާއިތުވި 2023 ވަނަ އަހަރުގެ މި މުއްދަތުގައި ޒިޔާރަތްކުރި 69،553 ފަތުރުވެރިންނާ އަޅާބަލާއިރު 13.6 އިންސައްތައިގެ ކުރިއެރުމެކެވެ.
މި މުއްދަތުގައި ރާއްޖެއަށް އެންމެ ގިނަ ފަތުރުވެރިން ޒިޔާރަތްކޮށްފައިވަނީ ރަޝިއާ މާކެޓުންނެވެ. އެގޮތުން ރަޝިއާއިން 14،638 ފަތުރުވެރިން އައިސްފައިވާއިރު، ލިސްޓުގެ ދެވަނައިގައި 10،298 ފަތުރުވެރިންނާއެކު އޮތީ އިޓަލީއެވެ. އަދި 5،959 ފަތުރުވެރިންނާއެކު އިނގިރޭސިވިލާތް ތިންވަނައިގައި އޮތްއިރު، ފަތުރުވެރިކަމުގެ ގަދަ ދިހައެއްގައި ޖަރުމަނު، ޗައިނާ، އިންޑިއާ، އެމެރިކާ، ފްރާންސް، ކަޒަކިސްތާން އަދި އޮސްޓްރޭލިއާ ހިމެނެއެވެ.
ފަތުރުވެރިންގެ ބޮޑު އިންސައްތައެއް، އެއީ 77،935 މީހުން ރާއްޖެ އެތެރެވެފައިވަނީ ވެލާނާ އިންޓަނޭޝަނަލް އެއާޕޯޓުންނެވެ. މީގެ އިތުރުން މާފަރު، ގަން، ހަނިމާދޫ، މާމިގިލި އަދި ދާލު އެއާޕޯޓުންވެސް އަދަދުތަކެއް ވަނީ ރާއްޖެ އެތެރެވެފައެވެ. ޗުއްޓީ ހޭދަކުރުމަށް ފަތުރުވެރިންގެ މެދުގައި އެންމެ މަގުބޫލީ ރިސޯޓުތަކެވެ. އެގޮތުން 54،573 ފަތުރުވެރިން ރިސޯޓުތަކުގައި ޗުއްޓީ ހޭދަކުރަމުންދާއިރު، 20،102 ފަތުރުވެރިން ތިބީ ގެސްޓްހައުސްތަކުގައެވެ. މިވަގުތު ރާއްޖޭގައި ފަތުރުވެރިންނަށް ޚިދުމަތް ދިނުމަށް ރިސޯޓް، ހޮޓެލް، ގެސްޓްހައުސް އަދި ސަފާރީތައް ހިމެނޭހެން ޖުމްލަ 67،647 އެނދު އޮޕަރޭޝަނަށް ގެނެވިފައިވާކަމަށް ތަފާސްހިސާބުތަކުން ދައްކައެވެ.
ކިޔުންތެރިންގެ ހިޔާލު