ނުކުޅެދުންތެރިކަން ހުންނަ ފަރާތްތަކަށް ވަޒީފާ ހަމަޖެހުނު ކަމުގައިވިޔަސް، ދައުލަތުން އެފަރާތްތަކަށް ދެމުންދާ އެލަވަންސް ކަނޑާނުލާނެކަމުގެ ޔަޤީންކަން އިޖްތިމާޢީ އަދި ޢާއިލީ ތަރައްޤީއާބެހޭ ވަޒީރު ޑރ. ޢައިޝަތު ޝިހާމް ދެއްވައިފިއެވެ. ރައީސުލްޖުމްހޫރިއްޔާގެ އޮފީހުން ތައްޔާރުކޮށް ގެނެސްދޭ “ތަރުޖަމާނާއެކު” ޕްރޮގްރާމުގައި ވާހަކަ ދައްކަވަމުން، ވަޒީރު ވިދާޅުވީ މި އެލަވަންސަކީ ޤާނޫނުން ލާޒިމްކުރާ އެއްޗެއް ކަމަށާއި، އެހެން އާމްދަނީއެއް ލިބުނު ނަމަވެސް އެލަވަންސް ލިބުމަށް އެއްވެސް ހުރަހެއް ނޯންނާނެ ކަމަށެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް، ނުކުޅެދުންތެރިކަން ހުންނަ ފަރާތްތަކަށް ވަޒީފާގެ ފުރުޞަތު ފަހިކޮށްދިނުމުގެ މަސައްކަތް ބާރަށް ކުރިއަށްދާކަން ވަޒީރު ފާހަގަކުރެއްވިއެވެ. އެގޮތުން މިހާތަނަށް 356 ފަރާތަކަށް ދައުލަތުގެ އެކި މުއައްސަސާތަކާއި ކުންފުނިތަކުން ވަޒީފާ ހަމަޖައްސައިދީފައިވާ ކަމަށް ވަޒީރު ވިދާޅުވިއެވެ.
ވަޒީފާގެ މާހައުލުގައި ނުކުޅެދުންތެރިކަން ހުންނަ ފަރާތްތަކަށް މުސާރަ ދިނުމުގައި އެއްވެސް ތަފާތުކުރުމެއް ނުގެންގުޅޭނެ ކަމަށާއި، އެފަރާތްތަކަށްވެސް ލިބޭނީ އެހެން މުވައްޒަފުންނާ އެއް ހަމައެއްގެ މުސާރައެއް ކަމަށް ވަޒީރު ވިދާޅުވިއެވެ. މީގެ އިތުރުން، އެފަރާތްތަކަށް ބޭނުންވާ ތަމްރީނުތައް ދީ، ވަޒީފާގެ މާހައުލުގައި ހަރަކާތްތެރި ބަޔަކަށް ހެދުމަށް ސަރުކާރުން އިސްކަންދޭކަންވެސް ވަޒީރު ފާހަގަކުރެއްވިއެވެ.
މި މަސައްކަތުގެ މައިގަނޑު މަޤްޞަދަކީ ނުކުޅެދުންތެރިކަން ހުންނަ ކުދިންނާމެދު މުޖުތަމަޢު ދެކޭގޮތް ބަދަލުކޮށް، އެފަރާތްތަކަކީ އަމިއްލަ ފައިމައްޗަށް ތެދުވެފައިވާ، މުޖުތަމަޢުގައި ބައިވެރިވާ ބަޔަކަށް ހެދުން ކަމަށް ވަޒީރު ވިދާޅުވިއެވެ.
ކިޔުންތެރިންގެ ހިޔާލު