އެމެރިކާގެ ގައުމީ މަސްލަހަތު ހިމާޔަތްކުރުމަށް ކަމަށް ވިދާޅުވެ، ރައީސް ޑޮނަލްޑް ޓްރަމްޕްގެ ސަރުކާރުން އދ. ގެ މުހިންމު އިދާރާތަކާއި ބައިނަލްއަގްވާމީ އެހެނިހެން ޖަމިއްޔާތަކުން އެމެރިކާ ވަކިވުމަށް ނިންމަވައިފިއެވެ. މީގެ ތެރޭގައި މޫސުމީ ބަދަލުތަކާ ގުޅޭ މުއާހަދާތަކާއި، ޖެންޑާ އިކުއަލިޓީ އަދި އަންހެނުންގެ ހައްގުތަކަށް މަސައްކަތްކުރާ އދ. ގެ މުހިންމު ގުނަވަންތައް ހިމެނެއެވެ.
ޓްރަމްޕްގެ ސަރުކާރުގެ އިސް އޮފިޝަލުންނަށް ފޮނުއްވި މެމޯއެއްގައިވާ ގޮތުން، އެމެރިކާއިން ވަކިވާން ކަނޑައަޅާފައިވާ ލިސްޓުގައި އދ. ގެ 31 އިދާރާއަކާއި، އެ ނޫންވެސް ބައިނަލްއަގްވާމީ 35 ޖަމިއްޔާއެއް ހިމެނެއެވެ. މި ނިންމުމަކީ އެމެރިކާގެ ގައުމީ މަސްލަހަތާ ޚިލާފަށް އެތަންތަން ހިންގަމުންދާތީ ނިންމި ނިންމުމެއް ކަމަށް ޓްރަމްޕް ވަނީ ވިދާޅުވެފައެވެ. މި ފިޔަވަޅާއެކު އެ ތަންތަނަށް އެމެރިކާއިން ދެމުން އައި މާލީ އެހީތެރިކަމާއި، އެ އިދާރާތަކުގެ ހިންގުމުގައި އެމެރިކާގެ ބައިވެރިވުން ގާނޫނީ ގޮތުން ހުއްދަކުރާ އެންމެ ބޮޑު މިނަވަރަކަށް ހުއްޓާލެވިގެންދާނެ ކަމަށް މެމޯގައި ބަޔާންކޮށްފައިވެއެވެ.
މޫސުމީ ބަދަލުތަކާ ގުޅޭގޮތުން އދ. އިން އެކުލަވާލާފައިވާ އޮނިގަނޑު ނުވަތަ ޔޫއެންއެފްސީސީސީން ވަކިވާ ފުރަތަމަ ގައުމަކަށް އެމެރިކާ ވެގެންދާނެކަން، ނެޗުރަލް ރިސޯސަސް ޑިފެންސް ކައުންސިލްގެ ވެރިޔާ މަނީޝް ބަޕްނާ ވަނީ ފާހަގަކުރައްވާފައެވެ. މީގެ ކުރިންވެސް އެމެރިކާއިން ވަނީ ކޮންމެ އަހަރަކު ބާއްވަމުން އަންނަ އދ. ގެ ކްލައިމެޓް ސަމިޓުގައި ބައިވެރިވުމަށް އިންކާރުކޮށްފައެވެ.
މީގެއިތުރުން، ދުނިޔޭގެ 150 އަށްވުރެ ގިނަ ގައުމުގައި އަންހެނުން ބާރުވެރިކުރުވުމަށް ހަރަކާތްތެރިވާ އދ. ގެ އިދާރާ (ޔޫއެންއެފްޕީއޭ) އަށް ދެމުން އައި ފައިސާގެ އެހީތައްވެސް މިދިޔަ އަހަރު އެމެރިކާއިން ވަނީ ކަނޑާލާފައެވެ. ޓްރަމްޕް ގެންދަވަނީ މީގެ ކުރިންވެސް އދ. ގެ އެކި ގުނަވަންތަކަށް އެމެރިކާއިން ހިލޭ ސާބަހަށް ދެމުން އައި އެހީތައް ވަރަށް ބޮޑަށް މަދުކުރައްވަމުންނެވެ. ދުނިޔޭގެ އެންމެ ބާރުގަދަ ގައުމުން އެޅި މި ހަރުކަށި ފިޔަވަޅާ ގުޅިގެން އދ. ގެ ސެކްރެޓަރީ ޖެނެރަލް އެންޓޯނިއޯ ގުޓަރެސް މިހާތަނަށް ރަސްމީކޮށް ވަކި އެއްޗެއް ވިދާޅުވެފައެއް ނުވެއެވެ.
ކިޔުންތެރިންގެ ހިޔާލު