ދިވެހިރާއްޖޭގެ ސިއްޙީ މަރުކަޒުތަކުން ދެވޭ ޚިދުމަތްތައް ހަރުދާނާކުރުމަށް، އަލަށް ބޭނުން ކުރަންފަށާފައިވާ ސޮފްޓްވެއާރތައް ތައާރަފްކޮށްފި އެވެ.

ހެލްތު މިނިސްޓްރީގައި ބޭއްވި ރަސްމިއްޔާތެއްގައި މި ސޮޕްޓްވެއަރތައ ލޯންޗްކޮށްދެއްވީ މިނިސްޓަރ އޮފް ސިޓީސް، ލޯކަލް ގަވަރންމަންޓް އެންޑް ޕަބްލިކް ވާރކްސް އާދަމް ޝަރީމް އުމަރެވެ.

އަލަށް ލޯންޗް ކުރެއްވި ސޮފްޓްވެއަރތަކުގެ ތެރޭގައި ހިމެނެނީ، އެކި ކަންކަމާއި ގުޅިގެން ޓެކްނިކަލް ސަޕޯޓް ނުވަތަ އެހެނިހެން ސަޕޯޓް ހޯދުމަށް ޞިއްހީ ވުޒާރާއާއި ކުރެވޭ މުއާމަލާތްތައް ޑިޖިޓަލްކޮށް ޓްރެކް ކުރުމާއި ބެހޭ ސޮފްޓްވެއާ އަކާއި، ހެލްތު ސެންޓަރުތަކުގެ މެޑިކަލް ސްޓޮކް އަދި ބޭހުގެ ސްޓޮކް ޑިޖިޓަލްކޮށް ރިއަލް ޓައިމްގައި ބެލެހެއްޓުމާއި ގުޅޭ ސޮފްޓްވެއާތަކެވެ. މީގެ އިތުރުން އިންސާނީ ވަސީލަތްތައް މެނޭޖް ކުރުމަށް ބޭނުންވާ އެޗް.އާރު ސޮފްޓްވެއާއަކާއި، ޞިއްހީ ވުޒާރާއާ ހިއްސާ ކުރަންޖެހޭ ލިޔެކިޔުންތައް ޑިޖިޓަލްކޮށް ހިއްސާ ކުރުމަށާއި ޓްރެކް ކުރުމަށް ބޭނުންވާ ޑިޖިޓަލް ޓޫލްސްގެ ސޮފްޓްވެއާ އެއް ހިމެނެ އެވެ.

ސިއްޙީ ޚިދުމަތް ހަރުދަނާކޮށް ޑިޖިޓަލް ކުރުމަށް ބޭނުންވާ އިތުރު ޓޫލްސްތައް ސޮފްޓްވެއާ ސޫޓްގެ ތެރޭގައި ހިމެނޭކަމަށްވެސް އެ ވުޒާރާއިން ވަނީ ބުނެފަ އެވެ.

މި ރަސްމިއްޔާތުގައި ސިއްހީ ވަޒީރުގެ އިތުރުން އެ ވުޒާރާގެ ގިނަ މުވައްޒަފުން ވަނީ ބައިވެރިވެފަ އެވެ.

ރާއްޖޭގައި ސިއްހީ ހިދުމަތް ދޭ ތަންތަނާއި، އެ ތަންތަނުން ދިނުމަށް ހުއްދަ ދީފައިވާ ސިއްހީ ހިދުމަތްތަކުގެ މައުލޫމާތު އެއްތަނަކުން ބަލައިލެވޭ ގޮތަށް ހާއްސަ ސޮފްޓްވެއާއެއް ތައްޔާރުކޮށް އިފުތިތާހުކޮށްފައި ވަނީ މިއަހަރުގެ ސެޕްޓަމްބަރުމަހު އެވެ. މި ސޮފްޓްވެއާ (ހެމްސް) އިފްތިތާހު ކޮށްދެއްވާފައިވަނީ ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުހައްމަދެވެ.

އެ ސިސްޓަމުގައި ރާއްޖޭގައި ރަޖިސްޓްރީކޮށްގެން ހިންގާ ސިއްހީ ހިދުމަތް ދޭ ހުރިހާ ތަންތަނެއްގެ އިތުރަށް، އެތަންތަނުން ފޯރުކޮށްދޭ ހިދުމަތްތަކާއި، އެތަންތަނުގައި މަސައްކަތްކުރާ ސިއްހީ ހިދުމަތްތެރިންނަކީ ކޮބައިކަން ފެންނަން ހުރެ އެވެ.