‏އޭޝިއާގެ ސެންޓްރަލް ޒޯން ވޮލީބޯޅަ މުބާރާތް، ވިމެންސް ކާވާ ކަޕް 2025 ގެ ފައިނަލްގައި ދިވެހިރާއްޖެއަށް ތަށި ހޯދައިދިނުމުގެ އަޒުމުގައި މިރޭ ފައިނަލަށް ނުކުންނަ ދިވެހި އަންހެން ޤައުމީ ވޮލީ ޓީމަށް ރައީސް ޑރ. މުޙައްމަދު މުޢިއްޒު މިއަދު ހިތްވަރުދެއްވައިފިއެވެ.

ޖުމްލަ އެކު، ހަތަރު ގައުމާ އެކު، މާލޭގައި ކުރިއަށްދާ ކާވާ ވިމެންސް ކަޕްގެ ފައިނަލުގައި މިރޭ ރާއްޖޭން ކުޅޭނީ ކިރްގިސްތާނާ ދެކޮޅަށެވެ.

ދިވެހި ޓީމަށް ހިތްވަރުދެއްވައި ރައީސް މީސްމީޑިއާގައި ކުރެއްވި ޕޯސްޓެއްގައި ވިދާޅުވީ، ދިވެހި ޤައުމީ އަންހެން ވޮލީބޯޅަ ޓީމު، ކާވާ ކަޕް 2025 ގައި މޮޅު ކުޅުމެއް ދައްކައި، މުބާރާތުގެ ފައިނަލަށް ދަތުރުކުރުމަކީ ވަރަށް ބޮޑު ފަޚުރެއް ކަމަށެވެ.

‏”މިރޭ އޮންނަ ފައިނަލްމެޗު ކާމިޔާބުކޮށް މުބާރާތުގެ ޗެމްޕިއަންކަން ދިވެހީންނަށް ލިބުމަކީ އަޅުގަނޑުމެން އެންމެންގެވެސް އުންމީދު. ދިވެހި ރައްޔިތުން މިތިބީ ދިވެހި ޤައުމީ ޓީމާއެކު.” ގައުމީ ޓީމަށް ހިތްވަރުދެއްވަމުން ރައީސް ވިދާޅުވެފަވެއެވެ.

މިރޭ ކިރިގިސްތާނާ ދެކޮޅަށް ރާއްޖެ ފައިނަލަށް ނުކުނައިރު، ރައުންޑް ރޮބިން ބުރުގައި ރާއްޖެ ވަނީ 3-1 ސެޓުން އެ ޓީމު ބަލިކޮށްފައެވެ.

ރާއްޖެ ފައިނަލަށް ދިޔައީ ހުރިހާ މެޗަކުން ވެސް މޮޅުވެގެންނެވެ.

ކިރްގިސްތާނާއި ރާއްޖޭން ވިމެންސް ކާވާ ކަޕްގައި ކުޅޭ ފައިނަލް މެޗު ފަށާނީ މިރޭ ރާއްޖެ ގަޑިން 20:40 ގަ އެވެ.