މަސްވެރިންގެ ދުވަހާ ދިމާކޮށް ބޮޑުކަންނެލި މަސްވެރި މަސް ދޯނިތަކުގައި ކުރި މުޒާހަރާގެ ތެރެއިން ހައްޔަރުކުރި ކެންދޫ ދާއިރާގެ މެންބަރު މައުރޫފް ޒާކިރު ހޮސްޕިޓަލްގައި އެޑްމިޓްކޮށްފިއެވެ.

މިދިޔަ ބުދަ ދުވަހުން ފެށިގެން ކުރަމުން ދިޔަ މުޒާހަރާ ބާރުގެ ބޭނުންކޮށްގެން ބުރާސްފަތި ދުވަހު ރޫޅާލައި ފުލުހުން ވަނީ މައުރޫފް ހިމެނޭހެން ބައެއް މަސްވެރިން ހައްޔަރުކޮށްފައެވެ.

އެ މައްސަލައާ ގުޅިގެން މައުރޫފްގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް އިއްޔެ ވަނީ ހާޒިރުކޮށްފައެވެ. އަދި ކޯޓުން ވަނީ މައުރޫފްގެ ބަންދަށް ފަސް ދުވަސް ޖަހައިފައެވެ.

އެމްޑީޕީގެ އޮފިޝަލަކު ވިދާޅުވީ މައުރޫފްގެ އޮޕަރޭޝަނެއް ކުރަންޖެހޭކަމަށް ޑޮކްޓަރު އަންގާފައިވާ ކަމަށެވެ. އަދި އެކަމުގެ އިތުރު ތަފްސީލު އެނގޭނީ އާއިލާއަށް ކަމަށް އޮފިޝަލް ވިދާޅުވިއެވެ.

މައުރޫފްއަކީ މަސްވެރިންގެ ޔޫނިއަންގެ ޖެނެރަލް ސެކެޓްރީ ވެސް މެއެވެ.

މައުރޫފް ހައްޔަރުކުރުމާ ގުޅިގެން، އޭނާ ދޫކޮށްލަން އެމްޑީޕީން އަންނަނީ ގޮވާލަމުންނެވެ.

މައުރޫފް ހައްޔަރުކުރި މައްސަލަ އެމްޑީޕީން ވަނީ އިންޓަ ޕާލިމެންޓަރީ ޔޫނިއަން (އައިޕީޔޫ)އަށް ވެސް ހުށަހަޅައިފައިއެވެ.