ވަރަށް ބޯކޮށް ވާރޭވެހި، ސައުދީ އަރަބިއްޔާގެ މައްކާ ޕްރޮވިންސްގައި ހިމެނޭ ސިޓީއެއް ކަމަށްވާ ޖިއްދާގައި ވަރަށް ބޮޑަށް ފެންބޮޑުވެއްޖެއެވެ.

ވިދާ ގުގުރުމާއެކު ބޯކޮށް ވާރޭ ވެހުމުގެ އިތުރުން، ގަދަ ވައިގެ ސަބަބުން ތަފާތު ހާދިސާތައް ހިނގަމުންދާ ކަމަށްވެސް ޚަބަރުތައް ބުނެއެވެ.

އެގޮތުން ހިނގި ހާދިސާއެއްގައި އެކަކު މަރުވެފައިވާ ކަމަށް ސައުދީ މީޑިއާއިން ރިޕޯޓް ކުރެއެވެ.

ވިއްސާރައިގެ ސަބަބުން ޖިއްދާ ސިޓީއަށް މިހާރު ވަނީ ރެޑް އެލަރޓްވެސް ނެރެފައެވެ.

މަގުތަކުގައި ފެންބޮޑުވުމުގެ ސަބަބުން ދުއްވާ އެއްޗެހި ދުއްވުން ހުއްޓި، ދަތުރުފަތުރަށް ވަނީ ހުރަސް އެޅިފައެވެ.

ބައެއް ސަރަހައްދުތަކުގެ މަގުތަކުގައި ކާރުތައް ހުރީ އެކަށް ފެނުއަޑިއަށް ގޮސްފައެވެ. ޖިއްދާގެ މައި އެތައް މަގެއްވަނީ ބަންދުވެފައެވެ.

ޖިއްދާގެ އިތުރުން، މަދީނާ އަދި މައްކާ ސިޓީއަށް މޫސުން ގޯސްވެފައިވަނީ އިއްޔެއިން ފެށިގެންނެވެ.

މަދީނާ ސިޓީގެ އެކި ހިސާބުތަކުގައިވެސް ފެންބޮޑުވެފައިވާ ކަމަށް، މީޑިއާ ރިޕޯޓްތައް ބުނެއެވެ.

ޖިއްދާ، މަދީނާ އަދި މައްކާ ސިޓީއަށް ވިއްސާރައިގެ ސަބަބުން ލިބެމުންދާ ގެއްލުތަކާއި، އެތައް ހިސާބެއްގައި ފެންބޮޑުވެފައިވާ މަންޒަރުތައް ފެންނަ ވީޑިއޯތައް ސޯޝަލް މީޑިއާގައި ދަނީ ދައުރުވަމުންނެވެ.

މޫސުން ގޯސްވެ، ބޯކޮށް ވާރޭވެހި ފެންބޮޑުވާނެ ކަމަށް ލަފާކޮށް ސައުދީ އަރަބިއްޔާގެ ނޭޝަނަލް ސެންޓަރ ފޮރ މީޓިއޮރޮލޮޖީން ކުރިންވެސް އޮތީ، އެކަމަށް އާންމުން ސަމާލުވެ ތިބުމަށް އެދި އިންޒާރު ނެރެފައެވެ.