މާލޭ ބާޒާރުމަތީގައި، ކުރިން އެސްޓީއޯ ހޯމް އިމްޕްރޫވްމަންޓް ހިންގި ތަނުގައި، ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން މިއަދު އާ ހޯލްސޭލް ސެންޓަރެއް ހުޅުވައިފިއެވެ.
އެސްޓީއޯއިން މި ފިހާރަ ހުޅުވުމުގެ މައިގަނޑު މަޤްސަދަކީ ކެއިންބުއިމަށް ބޭނުންވާ އަސާސީ ކާބޯތަކެތި ހެޔޮ އަގެއްގައި، ފަސޭހައިން ހޯލްސޭލްކޮށް ވިޔަފާރިވެރިންނަށާއި އާންމުންނަށް ލިބޭނެ މަގުފަހިކޮށްދިނުންކަމަށް އެކުންފުނިން ބުންޏެވެ.
އެސްޓީއޯއިން ބުނީ ސަރުކާރުގެ ސިޔާސަތުގެ ދަށުން ކަނޑައަޅާފައިވާ ހަނޑޫ، ހަކުރު، ފުށުގެ އިތުރުން އަސާސީ 23 ބާވަތް މި ސެންޓަރުން ލިބޭނެކަމަށެވެ. މީގެ އިތުރުން، މާލެއިން ރަށްރަށަށް މުދާ އުފުލާ ބޯޓުތަކަށް މި ތަކެތި ފަސޭހަކަމާ އެކު ލިބޭނެ އިންތިޒާމު ހަމަޖެހިގެންދާނެ ކަމަށާއި، އަދި މި ފިހާރަ މެދުވެރިކޮށް ދަނޑުވެރިން އުފައްދާ ބާވަތްތައް ހޯލްސޭލްކޮށް ގަނެވޭނެ އިންތިޒާމު ވެސް ހަމަޖެހިފައިވާކަމަށެވެ.
އެސްޓީއޯގެ އަމާޒަކީ ކުރިއަށް އޮތްތަނުގައި ހުޅުމާލޭގައި ވެސް އައުޓްލެޓެއް ހުޅުވައި، ގްރޭޓާ މާލޭ ސަރަހައްދުގައި ދިރިއުޅޭ ފަރާތްތަކަށް ޚިދުމަތްތައް ފުޅާކުރުން ކަމަށް ވެސް އެކުންފުނިން ބުންޏެވެ.
ކިޔުންތެރިންގެ ހިޔާލު