ސްރީލަންކާއަށް ދިމާވެފައިވާ ހިތާމަވެރި ކާރިސާގައި ދިވެހިންގެ ފަރާތުން އެހީވުމަށް ކުރިއަށްގެންދާ “ސިލޯނާއެކު ދިވެހިން” ޓެލެތޯން ފަށައިފިއެވެ.

އަވަށްޓެރި ސްރީލަންކާއަށް އެރި ބާރުގަދަ ތޫފާން ޑިޓްވާއާ އާއި ހަފްތާއެއް ވަންދެން ކުރި ވިއްސާރައިގައި، ހާލުގައި ޖެހިފައިވާ ހިތާމަވެރި ހާލަތާ ގުޅިގެން، އެގައުމަށް އެހީތެރިކަން ފޯރުކޮށްދިނުމަށް މިއަދު ހެދުނު 9:00 އިން މިރޭ ދަންވަރު 01:00 އަށް ކުރިޔަށް ގެންދާ މި ޓެލެތޯންއަށް ރާއްޖޭގެ 26 މީޑިއާއަކުން ވަނީ ބައިވެރިވެފައެވެ.

ޕީއެސްއެމުން އިސްނަގައިގެން ކުރިޔަށް ގެންދާ މި ޓެލެތޯންގައި ބައިވެރިވުމުގެ ފުރުސަތު ރާއްޖޭގެ ހުރިހާ ރައްޔިތުންނާއި، ޖަމިއްޔާ ޖަމާއަތްތަކާއި، ކްލަބްތަކާއި، އޮފީސްތައް ފަދަ ހުރިހާ ފަރާތްތަކަށް ވެސް ވަނީ ހުޅުވާލާފައެވެ.

އެހީގެ އަތެއް ދިނުމަކީ އިސްލާމްދީނުގައި ވެސް ވަރަށް ބޮޑަށް ބާރުއަޅުއްވާ ކަމެއް ކަމަށްވުމާއެކު، ލަންކާގެ ހާލުގައި ޖެހިފައިވާ ރައްޔިތުންނަށް އެހީތެރިވުމަށް ދިވެހި ހުރިހާ ފަރާތްތަކުން އެއްބައިވެ، މި ޓެލެތޯނުގައި ބައިވެރިވުމަށް ޕީއެސްއެމްއިން ވަނީ އިލްތިމާސްކޮށްފައެވެ.

ޓެލެތޯނަށް ބޭނުން ކުރާ އެކައުންޓް ނެމްބަރުތައް:

ރުފިޔާ އެކައުންޓް ނަން: ސިލޯނާއެކު ދިވެހިން

އެކައުންޓް ނެމްބަރު: 7730000796107

ޑޮލަރު އެކައުންޓް ނަން: ސިލޯނާއެކު ދިވެހިން

އެކައުންޓް ނެމްބަރު: 7730000796106

ޕީއެސްއެމުން ވަނީ މީގެ ކުރިން ވެސް އަވަށްޓެރި ގައުމުތަކަށް އެހީތެރިވުމުގެ ގޮތުން މިފަދަ ޓެލެތޯންތައް ބާއްވާފައެވެ. އެގޮތުން އެންމެ ފަހުން ފަލަސްތީނުގެ ރައްޔިތުންނަށް އެހީތެރިވުމުގެ ގޮތުން ރާއްޖޭގެ މީޑިއާތަކާއި ގުޅިގެން ބޭއްވި ޓެލެތޯން ވެސް ވަރަށް ފުރިހަމަކަމާއެކީ ވަނީ ކުރިއަށް ގެންގޮސްފައެވެ.

މި ޓެލެތޯނުގައި މާލެއާއި ހުޅުމާލެ އަދި ވިލިމާލޭގެ އެކި ސަރަޙައްދުތަކުގައި ފަންޑު ފޮށިތައް ބެހެއްޓުމުގެ އިތުރުން ފަންޑަށް އެހީވުމަށް ފަސޭހަ ގިނަ އިންތިޒާމްތަކެއް ވަނީ ހަމަޖައްސާފައެވެ. އެގޮތުން ކިއުއާރު ކޯޑް ސްކޭންކޮށްގެން ފަސޭހައިން ފައިސާ ޖަމާ ކުރެވޭނެ އިންތިޒާމްވަނީ ހަމަޖައްސާފައެވެ. އަދި ނަގުދު ފައިސާ، ޓްރާންސްފާ އަދި ބޭންކް ޗެކް މެދުވެރިކޮށްވެސް މިޓެލެތޯނަށް ފައިސާ ޖަމާކުރެވޭނެއެވެ.

ޓެލެތޯނަށް ލިބޭ ފައިސާ ޖަމާކުރުމަށް ހާއްސަ އެކައުންޓެއްވެސްވަނީ ހަދާފައެވެ. މިޓެލެތޯންގެ އޮޑިޓް ފަރމެއްގެ ގޮތުގައި މަސައްކަތް ކުރާނީ ކްރޯ މޯލްޑިވްސްއެވެ.