މާލެ ސަރަހައްދުގައި ދިރިއުޅޭ ރައްޔިތުންނަށް ދިމާވެފައިވާ ބޯހިޔާވަހިކަން ހައްލުކުރުމަށް ހިއްކަންޖެހޭ ގިރާވަރުފަޅު ހިއްކަން ބޭނުންވާ ޑްރެޖަރު މި މަހުގެ 23 ވަނަ ދުވަހު ރާއްޖެ އަންނާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ވެރިކަންކުރާ ޕީއެންސީން މިރޭ ބޭއްވި ފޯރިގަދަ ޖަލްސާގައި ރައީސް ވިދާޅުވީ އެ ޑްރެޖަރު އައުމާއެކު ލަސްތަކެއް ނުވެ ގިރާވަރުފަޅު ހިއްކުމުގެ މަސައްކަތް ފެށޭނެ ކަމަށެވެ. އަދި މި ސަރުކާރުން އެފަޅު އެއްކޮށް ހިއްކައި އެމްޑީޕީ ސަރުކާރުން އެ ފަޅުން ދޫކޮށްފައިވާ ގޯތިތައް އޭގެ ހައްގުވެރިންނަށް ދޭނެ ކަމުގެ ޔަގީންކަން ރައީސް ދެއްވިއެވެ.
ރައީސް ވިދާޅުވީ ގިރާވަރުގެ ކަނޑުން ވެސް އެމްޑީޕީ ސަރުކާރުން ގޯތިދީފައިވާ ކަމަށާއި އެކަމަށް ވެސް މި ސަރުކާރުން ހައްލު ގެންނާނެ ކަމަށެވެ.
އެމަނިކުފާނު ވިދާޅުވީ ހުޅުމާލެ ފޭސް 3 ހިއްކުމުގެ މަސައްކަތް ވެސް މިހާރު ވަނީ ފެށިފައި ކަމަށާއި އެތަނުން ބިން ހިއްކައި ގޯތިތަކުގެ ހައްގުވެރީންނަށް ގޯތިތައް ހަވާލުކޮށްދޭނެ ކަމަށެވެ.
މީގެއިތުރުން ހުޅުމާލެ ފޭސް 3 ގައި ފްލެޓް އެޅުމަށް ބީއެމްއެލް އިން ފްލެޓް އެޅުމަށް ޚާއްސަކޮށް އުފައްދާފައިވާ ކުންފުންޏާ ސަރުކާރުން ވަނީ ބިން ހަވާލުކޮށްފައެވެ.
ބީއެމްއެލް އިން ޖުމްލަ 3000 ފްލެޓް އަޅާއިރު، ހުޅުމާލެ ފޭސް 3 ގެ އިތުރުން ހުޅުމާލެ ފޭސް އެކަކާއި ވިލިމާލޭގައި ވެސް ފްލެޓްތައް އަޅާނެއެވެ.
އެ ފްލެޓްތަކަށް ކުރިމަތިލުމުގެ ފުރުސަތު ވަރަށް އަވަހަށް ހުޅުވާލައި އަދި ފޯމްތައް ލިބުމުން ލަސްތަކެއްނުވެ ފްލެޓް ލިބޭ ހައްގުވެރިން ކަނޑައަޅާނެ ކަމަށް ރައީސް ވިދާޅުވިއެވެ.
ކިޔުންތެރިންގެ ހިޔާލު