އިސްތިއުމާރީ އިސްރާއީލުގެ ސިފައިން މިއަދުވެސް ޣައްޒާގެ އެކި ހިސާބުތަކަށް ވަރުގަދަ ވައިގެ ހަމަލާތަކެއް ދެމުން އެބަ ގެންދެއެވެ.
އެގޮތުން، ޣައްޒާގެ އުތުރުން ގާޒާ ސިޓީއަށާއި، ބައިތު ލާހިޔާ އަދި ޣައްޒާގެ ދެކުނުން ޚާން ޔޫނިސްއަށް ވަރުގަދަ ވައިގެ ހަމަލާތަކެއް ދީފައި ވެއެވެ.
އަދި އެ ރަށްތަކަށް ބޮޑުބަޑީގެ ހަމަލާތައްވެސް ދީފައިވާ ކަމަށް ރިޕޯޓްތައް ބުނެއެވެ.
މީގެއިތުރުން، ގާޒާ ސިޓީއާއި، ޚާން ޔޫނިސްގައި އެތައް ގެއަކާއި އިމާރާތްތަކެއް ޓެރަރިސްޓުން ގެންދަނީ ގޮއްވައި އަދި ބުލްޑޯޒަރު ބޭނުންކޮށްގެން ވައްޓައި ބިމާހަމަ ކުރަމުންނެވެ.
އިސްތިއުމާރީ ސިފައިން މިއަދު ފުރަތަމަ ހަމަލާދިން އެއްވެސް ސަރަހައްދަކީ، އެމީހުން ޣައްޒާގައި ދަމާފައިވާ ކަމަށް ބުނާ “ޔެލޯލައިން” ގޭ ބޭރުން ހިމެނޭ ސަރަހައްދުތަކެވެ.
ޔެލޯލައިންގެ އެތެރޭގައި ހިމެނޭ ހުރިހާ ހިސާބެއް ކޮންޓްރޯލް ކުރަނީ އިސްތިއުމާރީ ޓެރަރިސްޓުންނެވެ.
މީގެއިތުރުން، ޔެލޯލައިންގެ އެތެރޭގެ ސަރަހައްދުތަކަށް މީގެ އިރުކޮޅެއް ކުރިން ވައިގެ ދެ ހަމަލާއެއްދީ އަދި ގެތަކާއި އިމާރާތްތައްވެސް ބިމާހަމަ ކުރަމުން އެބަ ގެންދެއެވެ.
ހަމަލާތައް ހުއްޓާލުމަށް ވެފައިވާ އެއްބަސްވުމަށް އަމަލުކުރަން ފެށިތާ މަހަކަށްވުރެ ގިނަދުވަސް ވެގެން ގޮސްފައިވާއިރު، އެއްބަސްވުމާ ޚިލާފްވެ އިސްތިއުމާރީ ސިފައިން ކޮންމެ ދުވަހަކު ގެންދަނީ ޣައްޒާއަށް ބޮމާއި މިސައިލުން ހަމަލާދީ، އަދި ބޮޑުބަޑީގެ ހަމަލާތައް ދެމުންނެވެ.
އެއްބަސްވުމަށް އަމަލުކުރަން ފެށިފަހުން ހަމަލާދީ މިހާތަނަށް ޣައްޒާއިން 245 މީހުން ޝަހީދު ކޮށްލާފައި ވާއިރު، 627 މީހުން ޒަޚަމްކޮށްލާފައި ވެއެވެ.
ކިޔުންތެރިންގެ ހިޔާލު