ދުނިޔޭގެ ފަތުރުވެރިކަމުގެ ދާއިރާގައި ރާއްޖޭގެ ދައުރު އިތުރަށް ބޮޑުވެ، އދ.ގެ ފަތުރުވެރިކަމާ ބެހޭ ޖަމްޢިއްޔާ ޔޫއެންޑަބްލިއުޓީއޯ (UNWTO) ގެ 26 ވަނަ ސެޝަންގެ ވައިސް ޕްރެޒިޑެންޓް ކަމަށް ރާއްޖެ އިންތިޚާބުވެއްޖެއެވެ. މިއީ ދިވެހިރާއްޖެއަށް ލިބުނު ބޮޑު ކާމިޔާބީއެކެވެ.

ސަޢުދީ ޢަރަބިއްޔާގެ ރިޔާދުގައި މިހާރު ކުރިއަށްދާ އ.ދ. ގެ ފަތުރުވެރިކަމާ ބެހޭ ޖަމްޢިއްޔާގެ މި އަހަރުގެ އާއްމު ބައްދަލުވުން ކުރިއަށްދަނީ ނޮވެމްބަރު މަހުގެ 7 އިން 11 އަށެވެ. ކޮންމެ ދެ އަހަރުން އެއް އަހަރު ބާއްވާ މި ބައްދަލުވުން މިފަހަރު ކުރިއަށް ދަނީ “އޭ.އައި. ޕަވަރޑް ޓޫރިޒަމް: ރީޑިފައިނިންގ ދަ ފިއުޗަރ” މި ޝިއާރުގެ ދަށުންނެވެ.

ވައިސް ޕްރެޒިޑެންޓްގެ ހައިސިއްޔަތުން، ނޮވެމްބަރު 9 ވަނަ ދުވަހު ބޭއްވި އާއްމު ބައްދަލުވުމުގެ ރިޔާސަތު ބެލެހެއްޓެވީ ފަތުރުވެރިކަމާ ތިމާވެއްޓާ ބެހޭ ވަޒީރު ޠާރިޤު އިބްރާހީމްއެވެ. މި ރިޔާސަތު ބެލެހެއްޓެވުމަކީ ބައިނަލްއަޤްވާމީ މަސްރަހުގައި ރާއްޖޭގެ ނުފޫޒު އޮތް މިންވަރު ދައްކުވައިދޭ ކަމެކެވެ.

މި އަހަރުގެ ސެޝަންގައި ރާއްޖެއިން ވަނީ އދ. ގެ ފަތުރުވެރިކަމާ ބެހޭ ޖަމްޢިއްޔާގެ “ވާރކިން ގްރޫޕް އޮން ޓުއަރިޒަމް އެންޑް ކްލައިމެޓް” ގައި ބައިވެރިވެފައެވެ. މި ގްރޫޕްގެ މައިގަނޑު މަޤުޞަދަކީ މޫސުމަށް އަންނަ ބަދަލުތަކަށް ރިއާޔަތްކޮށް ފަތުރުވެރިކަން ކުރިއެރުވުމަށް މަސައްކަތްކުރުމެވެ. މީގެ އިތުރުން، އިންޓަރ-އިންސްޓިޓިއުޝަނަލް ވާރކިންގ ގްރޫޕް އޮން ޓުއަރިޒަމް އެންޑް ކްލައިމެޓް އެކްޝަންގެ ވައިސް ޗެއަރއަށްވެސް ރާއްޖެ ވަނީ މި އަހަރުގެ އާއްމު ބައްދަލުވުމުގައި އައްޔަނުކޮށްފައެވެ. މިއީ ދެކޮޅަށް ފައިދާހުރި ގުޅުންތަކެއް ބިނާކޮށް، ފަތުރުވެރިކަމުގެ ދާއިރާގައި ދިވެހިރާއްޖެއަށް ލިބޭ ބައިނަލްއަޤްވާމީ އެއްބާރުލުން އިތުރުކުރެވޭނެ ފުރުޞަތެކެވެ.

މި ބައްދަލުވުމުގައި އދ.ގެ މެންބަރު ޤައުމުތަކާއި، އެފިލިއޭޓް މެންބަރުންނާއި، ބައިނަލްއަޤްވާމީ އަދި ސަރަޙައްދީ ޖަމްޢިއްޔާ ޖަމާޢަތްތަކުގެ މަންދޫބުން ވަނީ ބައިވެރިވެފައެވެ. މި ބައްދަލުވުމުގެ ހަވާސާގައި ވަޒީރު ޠާރިޤު އިބްރާހީމް އެކި ޤައުމުތަކުގެ ފަތުރުވެރިކަމާ ބެހޭ ވަޒީރުންނާއި، ބައިނަލްއަގްވާމީ އެކި ޖަމްޢިއްޔާގެ މަންދޫބުންނާއި ބައްދަލުކޮށް ފަތުރުވެރިކަމުގެ ދާއިރާއިން ގުޅުން ބަދަހި ކުރުމަށް ވަނީ މަޝްވަރާ ކުރައްވާފައެވެ. މި މަޝްވަރާތަކުގެ ސަބަބުން ރާއްޖޭގެ ފަތުރުވެރިކަމުގެ ސިނާޢަތު އިތުރަށް ފުޅާކުރުމަށް މަގުފަހިވެގެންދާނެއެވެ.