އިސްތިއުމާރީ އިސްރާއީލުން ޣައްޒާގެ ދެކުނުން ޚާން ޔޫނިސްއަށް މިއަދު ޑްރޯން ހަމަލާއެއްދީ ކުޑަކުއްޖަކާއި އިތުރު މީހަކު ޝަހީދު ކޮށްލައިފިއެވެ.

ހަމަލާތައް ހުއްޓާލުމަށް ވެފައިވާ އެއްބަސްވުމާ ޚިލާފްވެ، އިސްތިއުމާރީ ޓެރަރިސްޓުން ގެންދަނީ ކެނޑިނޭޅި ޣައްޒާގެ އެކި ހިސާބުތަކަށް އެއްގަމާއި ވައިގެ މަގުން ޙަމަލާދީ އެތައް ބަޔަކު ޝަހީދު ކުރަމުންނެވެ.

އެންމެ ވަރުގަދައަށް މިހާރު އުދުވާނުތައް ހިންގަމުން ގެންދަނީ ޣައްޒާގެ ދެކުނުގެ ރަށްތަކުގައެވެ.

ޚާން ޔޫނިސްއަކީ ގެދޮރު ގެއްލި ހާލުގައި ޖެހިފައިވާ މިލިއަނަކަށްވުރެ ގިނަ މީހުން ދިރިއުޅެމުންދާ ސަރަހައްދަކަށް  ވާއިރު، އެ ރަށަށް ކޮންމެ ދުވަހަކު އެތައް ހަމަލާއެއް ގެންދަނީ ދެމުންނެވެ.

މިއަދުވެސް ޚާން ޔޫނިސްގެ އުތުރު ފަޅިއާއި، ހުޅަނގު ފަޅިއަށް ވަރުގަދަ ވައިގެ ހަމަލާތަކެއް ދީފައި ވެއެވެ.

ޣައްޒާގެ ދެކުނުގެ އައް-ޒަންނާއަށް ބޮޑުބަޑީގެ ހަމަލާތަކެއްވެސް ދީފައި ވެއެވެ.

ޚާން ޔޫނިސްއަށް ޑްރޯން ހަމަލާއެއްދީ ދެމީހުން ޝަހީދު ކޮށްލާފައި ވާއިރު، އިސްތިއުމާރީ ޓެރަރިސްޓުންގެ އަސްކަރީ ވެހިކަލްތަކުން މިހާރުވެސް ގެންދަނީ ޣައްޒާގެ އުތުރުން ގާޒާ ސިޓީގައި އާންމުންނާ ދިމާއަށް ގޮތެއް ފޮތެއް ނުބަލައި ބަޑި ޖަހަމުންނެވެ.

ނުވިތާކަށް، މުޅި ގާޒާ ސިޓީގެ ވައިގެ ތެރޭގައި އިސްތިއުމާރީ ސިފައިންގެ ޑްރޯންތައް އުދުހި، އާންމުންނަށް ބިރު ދައްކަމުން ގެންދާ ކަމަށް ޣައްޒާއިން ލިބޭ ޚަބަރުތައް ބުނެއެވެ.

ހަމަލާތައް ހުއްޓާލުމުގެ އެއްބަސްވުމަށް އޮކްޓޫބަރު 10 ގައި އަމަލުކުރަން ފެށިފަހުން އެކަނިވެސް، ޓެރަރިސްޓުން ހަމަލާދީ ޣައްޒާއިން 241 މީހުން ޝަހީދުކޮށްލާފައި ވެއެވެ. އަދި 619 މީހުން ޒަޚަމްކޮށްލާފައި ވެއެވެ.

ހަމަލާތައް ހުއްޓާލުމުގެ އެއްބަސްވުމުގައި ވާގޮތަށް، އިސްރާއީލުގެ ދިރިތިބި 20 ގައިދީންނާއި، މަރުވެފައިވާ 28 މީހުންގެ ތެރެއިން 24 މީހެއްގެ ހަށިގަނޑު ހަމާސްއިން މިހާތަނަށް ހަވާލުކޮށްފައި ވާއިރު، އިސްތިއުމާރީ ޓެރަރިސްޓުން އެއްބަސްވި އެއްވެސް ކަމެއް ނުކޮށް ޣައްޒާއަށް ހަމަލާދީ މީހުން ޝަހީދުކޮށް އިންސާނީ އެހީވެސް އެތެރެކުރިޔަ ނުދީ ގެންދަނީ ހުއްޓުވަމުންނެވެ.

އެކަމަކު، އިސްތިއުމާރީ ދައުލަތް ހިމާޔަތްކުރާ އެމެރިކާއާއި ހުޅަނގުގެ ގައުމުތަކުން އެއްބަސްވުމާ އިސްރާއީލު ޚިލާފްވާ ކަމަށް ގަބޫލެއް ނުކުރެއެވެ.