ސެކަންޑް ވަރލްޑް ސަމިޓް ފޯ ސޯޝަލް ޑިވެލޮޕްމަންޓްގައި ބައިވެރިވެވަޑައިގަތުމަށް، ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުހައްމަދު ލަޠީފު، ޤަޠަރުގެ ދޯހާއަށް ކުރެއްވި ރަސްމީ ދަތުރުފުޅު ނިންމަވާލައްވައިފިއެވެ.

އެ ސަމިޓުގައި ރައީސުލްޖުމްހޫރިއްޔާގެ ނައިބު ވަނީ، ޝާމިލުކަމާއި، ހަމަހަމަކަމާއި، ވިލުންތެރިކަމުގެ ތަރަހައިގެ ތެރެއިން، ބައިނަލްއަޤުވާމީ ފެންވަރުގައި އިޖުތިމާޢީ ތަރައްޤީ ހޯދުމަށް މަސައްކަތްކުރުމުގެ އަޒުމުގެ މަތީ ދިވެހިރާއްޖެ ދެމިއޮންނާނޭކަމުގެ ޔަޤީންކަން ދެއްވައި ވާހަކަފުޅުދައްކަވާފައެވެ. އެވާހަކަފުޅުގައި އެމަނިކުފާނު ވަނީ، ޞިއްޙީ ދާއިރާ އާއި ތަޢުލީމީ ދާއިރާ ހަރުދަނާކުރުމަށާއި، ޢާންމު ޚިދުމަތްތައް ޑިޖިޓަލް ކުރުމަށާއި، މޫސުމީ ވިލުންތެރިކަން އިތުރުކުރުމަށް ދިވެހި ސަރުކާރުން ދޭ އަހުމިއްޔަތު ފާހަގަކުރައްވާފައެވެ.

މީގެއިތުރުން، ދަރަންޏަކީ ޤައުމުގެ ވިލުންތެރިކަން ބިނާކުރާ އާލާތަކަށް ހެދުމަށް ދިވެހިރާއްޖެއިން ކުރަމުންދާ މަސައްކަތަކަށް އަލިއަޅުއްވާލައްވައި، އިންސާނީ ތަރައްޤީއަށް ވުނަކުރުމުގެ ފުރުޞަތު ފަހިވާނޭފަދަ ގޮތަކަށް ދުނިޔޭގެ މާލީ ނިޒާމު އިޞްލާޙުކުރުމުގެ ބޭނުން އޮތް މިންވަރުގެ މައްޗަށް އެމަނިކުފާނު ވާހަކަފުޅުދެއްކެވިއެވެ. މީގެ އިތުރުން، އިޖުތިމާޢީ ތަރައްޤީގެ ލަނޑުދަނޑިއަށް ވާސިލުވުމަށް ދިވެހި ސަރުކާރުން ގެންގުޅޭ ވަށާޖެހޭ ސިޔާސަތުގެ ތެރެއިން، އަތްފޯރާފަށުގައި ބޯހިޔާވަހިކަން ފޯރުކޮށްދިނުމާއި، ޒުވާނުން ބާރުވެރިކުރުމާއި، އަންހެނުންގެ ބައިވެރިވުން ކަށަވަރުކުރުމާއި، ނުކުޅެދުންތެރިކަން ހުންނަ ފަރާތްތައް ކަންކަމުގައި ޝާމިލުކުރުމާއި، ޕެންޝަނާއި ސިއްޙީފަރުވާ އެންމެހާ ރައްޔިތުންނަށް ފޯރުކޮށްދިނުމަށް ކުރަމުންދާ މަސައްކަތްތަކުގެ މައްޗަށް އެމަނިކުފާނުގެ ވާހަކަފުޅުގައި އަލިއަޅުއްވާލެއްވިއެވެ.

ރައީސުލްޖުމްހޫރިއްޔާގެ ނައިބުގެ މި ދަތުރުފުޅުގެ ސަބަބުން، ބައިނަލްއަޤުވާމީ ގުޅުންތައް ދެމެހެއްޓުމަށާއި، އިޖުތިމާޢީ ޝާމިލުކަން ޤާއިމުކުރުމަށާއި، ދެމެހެއްޓެނިވި ތަރައްޤީއަށް ވާސިލުވުމަށް ދިވެހިރާއްޖެއިން އިޚުލާޞްތެރިކަމާއެކު މަސައްކަތްކުރަމުންގެންދާނޭކަން ހާމަކޮށްދެއެވެ.

ސެކަންޑް ވަރލްޑް ސަމިޓް ފޯ ސޯޝަލް ޑިވެލޮޕްމަންޓް ކުރިއަށްގެންގޮސްފައިވަނީ މި ނޮވެންބަރު މަހުގެ 4 އިން 6 އަށް ޤަޠަރުގެ ދޯހާގައެވެ. ޤައުމުތަކުގެ އިސް ވެރީންނާއި، ބައިނަލްއަޤުވާމީ ޖަމާޢަތްތަކާއި، މަދަނީ ޖަމުޢިއްޔާތަކާއި، އަމިއްލަ ފަރާތްތަކުން ވަނީ، އެ ސަމިޓުގައި ބައިވެރިވެ ވަޑައިގެންފައެވެ. އަދި އެ ފަރާތްތަކުން ވަނީ، 2030 އެޖެންޑާ ފޯ ސޯޝަލް ޑިވެލޮޕްމަންޓާ އެއްގޮތްވާ ގޮތުގެ މަތީން، އިޖުތިމާޢީ ތަރައްޤީއަށް ވާސިލުވުމާއި، ފަޤީރުކަން ނައްތާލުމާއި، ޝާމިލު މުޖުތަމަޢުތައް ބިނާކުރުމާ ގުޅޭގޮތުން ބައިނަލްއަޤުވާމީ ފެންވަރުގައި މަސައްކަތްކުރަމުންގެންދިއުމުގެ އަޒުމު އާކުރައްވާފައެވެ.