ކްރިމިނަލް ކޯޓުގެ ގާޒީ ކަމަށް ހއ. އިހަވަންދޫ، އުދަރެސް، އަހްމަދު ޝާފިއު އާއި ގއ. ކަނޑުހުޅުދޫ، ޔުނިކޯ، މުޒައްމިލު ނާސިރު އައްޔަންކޮށްފިއެވެ.

ސުޕްރީމް ކޯޓުގައި ރޭ ބޭއްވި ރަސްމިއްޔާތެއްގައި އެ ދެ ބޭފުޅުންނަށް ގާޒީ ކަމުގެ ހުވާ ލައިދެެއްވީ ހައިކޯޓުގެ ފަނޑިޔާރު މުހައްމަދު ޝަނީޒް އަބްދުﷲ އެވެ.

އެ ދެ ބޭފުޅުންގެ ތެރެއިން ޝާފިއު އަކީ ޕްރޮސިކިއުޓާ ޖެނެރަލްގެ އޮފީހުގައި ހަތަރު އަހަރު މަސައްކަތް ކުރެއްވި ބޭފުޅެކެވެ. އެންމެފަހުން އޭނާ ހުންނެވީ އެސިސްޓެންޓް ޕްރޮސިކިއުޓާ ޖެނެރަލް ކަމުގެ މަގާމުގައެވެ. އަދި އޭނާ އަކީ ޝަރުއީ ކޯޓްތަކުގައި އެކި މައްސަލަތަކުގައި ވަކާލާތު ކުރައްވާފައިވާ ތަޖުރިބާކާރު ވަކީލެކެވެ.

މީގެއިތުރުން އޭނާ އަކީ ބާ ކައުންސިލްގެ އެކްސްކޯ މެންބަރުކަން ވެސް ކުރައްވާފައިވާ ބޭފުޅެކެވެ.

މުޒައްމިލަކީ ގާނޫނީ ވަކީލެއްގެ ގޮތުގައި 11 އަހަރު މަސައްކަތް ކުރައްވާފައިވާ ބޭފުޅެކެވެ. ކްރިމިނަލް ކޯޓުގެ ގާޒީ ކަމަށް އައްޔަންކުރެވުުއިރު، އޭނާ ހުންނެވީ ޕްރޮސިކިއުޓާ ޖެނެރަލްގެ އޮފީހުގެ ޕަބްލިކް ޕްރޮސިކިއުޓަރެއްގެ މަގާމުގަ އެވެ. އޭނާ ވެސް ވަނީ ޖިނާއީ އެކި އެކި މައްސަލަތަކުގައި ދައުލަތުގެ ފަރާތުން ވަކާލާތު ކުރައްވާފައެވެ.