ތުއްތުކުދިންގެ ގާނޫނީ ބެލެނިވެރިކަންނަގާ ފަރާތްތަކާއި، މައިން މަރުވާ ހާލަތުގައި، އެ ދަރިފުޅުގެ ޒިންމާ ނަގާ ފަރާތްތަކަށް ހާއްސަ ޗުއްޓީ ލިބޭނެގޮތެއް ކަނޑައަޅައިދިނުމަށް އެދި ރައްޔިތުންގެ މަޖިލީހުގެ ގައުމީ ތަރައްގީ އާއި ތަރިކައިގެ ކޮމިޓީއަށް ހުށަހަޅައިފިއެވެ.
މި މައްސަލަ ކޮމިޓީއަށް ހުށަހެޅުއްވީ މައްޗަންގޯޅީ ދެކުނު ދައިރާގެ މެންބަރު މުސްތަފާ ހުސެއިން އެވެ.
ރައްޔިތުން ހުށަހެޅި މައްސަލަތަކަކާ ގުޅިގެން ކޮމިޓީއަށް މެންބަރު ހުށަހެޅުއްވި މައްސަލައިގައި ބުނެފައިވަނީ، ވިހެއުމާ ގުޅިގެން ލިބިދެވޭ ޗުއްޓީތައް ވަޒީފާއާބެހޭ ގާނޫނުގައި ބަޔާންކޮށްފައިވާ ކަމަށެވެ. އަދި މުވައްޒަފަކު ވިހެއުމުން ދަރިފުޅަށް ހަމަސް ވާންދެން، ބަންދު ދުވަސްތައް ހިމަނައިގެން މުސާރައާއެކު ޗުއްޓީ ދޭން ވާނެ ކަަމަށް ސިވިލްސާވިސް ގާނޫނުގައި ބަޔާންކޮށްފައިވާ ކަމަށެވެ.
ނަމަވެސް ހަ މަސްނުވާ ތުއްތުކުދީންގެ ގާނޫނީ ބެލެނިވެރިކަން ނަގާ ފަރާތްތަކާއި ވިހެއުމަށްފަހު ދަރިފުޅުގެ މަންމަ ނިޔާވާ ހާލަތުގައި، އެ ދަރިފުޅުގެ ޒިންމާ ނަގާ ފަރާތްތަކުގެ ތެރެއިން ސިވިލްސާވިސް ވަޒީފާ އަދާކުރާ ފަރާތްތަކަށް، ހާއްސަ ޗުއްޓީއެއް ދިނުމާމެދު އަމަލުކުރާނެ ވަކި އިޖުރާއަތެއް ނެތްކަމަށް ވަނީ ބުނެފައެވެ.
އެފަދަ ހާލަތުތައް ދިމާވެފައިވާ ރައްޔިތުންގެ ކަންބޮޑުވުންތައް ހިއްސާކޮށްފައިވާ ކަމަށް މެންބަރު މުސްތަފާ ހުސެއިން ވަނީ ފާހަަގަކުރައްވައިފައެވެ. އެހެންކަމުން އެފަދަ ޗުއްޓީއެއް އެފަރާތްތަކަށް ލިބޭނެގޮތަށް، ގާނޫނުތަކަށް ގެނެވިދާނެ ބަދަލުތައް ދިރާސާކޮށް، އެކަމަށް ހައްލެއް ހޯދައިދިނުމަށް އެ މައްސަލައިގައި މެންބަރު ވަނީ ކޮމިޓީގައި އެދިވަޑައިގެންފައެވެ.
ކިޔުންތެރިންގެ ހިޔާލު