“މޯލްޑިވްސް މީޑިއާ އެންޑް ބްރޯޑްކާސްޓިން ރެގިއުލޭޝަންސް ބިލު” ފާސްކުރުމަށް މިދިޔަ ސެޕްޓެމްބަރު މަހުގެ 16 ވަނަ ދުވަހު ބޭއްވި ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީގައި ހިޔާލު ތަފާތުވުން ބޮޑުވެ ހިނގައި ދިޔަ ކަންތައްގަނޑުގައި އެ ކޮމިޓީގެ މައިކަށް ލިބުނު ގެއްލުމުގެ އަގު ތިން މެންބަރުންގެ އަތުން ނަގަން މަޖިލީހުގެ އިމްތިޔާޒުތަކާއި ސުލޫކު ކޮމިޓީން ފާސްކޮށްފިއެވެ.
އެދުވަހުގެ ކޮމިޓީ ބައްދަލުވުމުގައި، ކެންދޫ ދާއިރާގެ އެމްޑީޕީ މެންބަރު މައުރޫފް ޒާކިރު ކޮމިޓީގެ މައިކެއް އޮން ކުރައްވައި ވާހަކަ ދައްކަވަން ފެއްޓެވުމުން، ކޮމިޓީގައި ނެތް މެންބަރަކަށް ވާހަކަ ނުދެއްކެވޭނެ ކަމަށް ވިދާޅުވެ، ހެންވޭރު ދެކުނު ދާއިރާގެ ޕީއެންސީ މެންބަރު ހުސައިން އިމްރާން ލަތީފް މައިކް ދައްމަވައިގަންނަވަން ފެއްޓެވިއެވެ.
މައިކަށް ގެއްލުން ލިބުނީ ތޮއްޑޫ ދާއިރާގެ އެމްޑީޕީ މެންބަރު ހުސައިން ސަމީރު، މައިކްގެ ވާގަނޑުގައި ހިފަހައްޓާފައި މައިކް ދަމައިނުގަނެވޭތޯ މަސައްކަތް ކުރެއްވުމުގެ މަސައްކަތްގަނޑުގެ ތެރޭގައެވެ.
މި މައްސަލައިގައި މައިކަށް ލިބުުނު ގެއްލުމާބެހެގޮތުން ގޮތެއް ނިންމައިދިނުމަށް އެދި އެ މައްސަލަ ކޮމިޓީއަށް ހުށަހެޅުއްވީ ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އެވެ.
ކޮމިޓީގެ މިއަދުގެ ބައްދަލުވުމުގައި އެ މައްސަލައިގައި ހިމެނޭ ތިން މެންބަރުންގެ އަތުން، މައިކަށް ލިބުނު ގެއްލުމުގެ އަގު އިދާރީ މޭޒުން ކޮމިޓީއަށް ހުށަހެޅުމުން، އޭގެ އަގު އެ މެންބަރުންގެ އަތުން ނަގަން ހުށަހެޅުއްވީ މަޑަވެލި ދާއިރާގެ މެންބަރު މުހައްމަދު ޝަމީޒް އެވެ. ތާއީދު ކުރެއްވީ ކިނބިދޫ ދާއިރާގެ މެންބަރު އަލީ އަޝްރަފް އެވެ.
ކިޔުންތެރިންގެ ހިޔާލު