ހަމަލާތައް ހުއްޓާލުމަށް ހަމާސްއައެކު ވެފައިވާ އެއްބަސްވުމާ ޚިލާފްވެ، އިސްތިއުމާރީ އިސްރާއީލުން ޣައްޒާގެ އެތަން މިތަނަށް ހަމަލާދީ އެތައް އާންމުން ޝަހީދުކޮށްލައިފިއެވެ.
ހަމާސްއާއި އިސްރާއީލާ ދެމެދު ވެވުނު ހަމަލާތައް ހުއްޓާލުމުގެ އެއްބަސްވުމަށް އަމަލުކުރަން ފަށާފައިވަނީ މި އޮކްޓޫބަރު މަހުގެ 10 ދުވަހުއެވެ.
ޣައްޒާ ސަރުކާރުގެ މީޑިއާ އޮފީހުން މިއަދު ބުނެފައިވަނީ، އިސްތިއުމާރީ ބާރުން މިހާތަނަށް އެއްބަސްވުމާ ޚިލާފް 47 ޖަރީމާއެއް ޣައްޒާގައި ހިންގާފައިވާ ކަމަށެވެ.
އެ ހަމަލާތަކުގައި މިހާތަނަށް 38 މީހުން ޝަހީދުކޮށްލާފައިވާ ކަމަށާއި، ޒަޚަމްކޮށްލި މީހުންގެ އަދަދު 143 އަށް އަރާފައިވާ ކަމަށްވެސް ބުނެފައި ވެއެވެ.
އިއްޔެ ހަވީރު އެކަނިވެސް ގާޒާ ސިޓީގެ ޒައިތޫން އަވަށުގައި ހަމަލާދީ އެއް އާއިލާގެ 11 މެމްބަރުން ޝަހީދުކޮށް މުޅި އާއިލާ ވުޖޫދުން ފޮހެލާފައި ވެއެވެ. އެ އާއިލާ ދަތުރުކުރި ވެހިކަލްއަށް ޓެރަރިސްޓުން ހަމަލާ ދީފައިވަނީ ބޮޑުބަޑިންނެވެ.
ސީދާ އާންމުންނަށް އަމާޒުކޮށް އާންމުންގެ ބޮލަށް ބޮންއަޅައި އަދި އާންމުންނަށް ބަޑީގެ ހަމަލާތައްވެސް ގެންދަނީ ދެމުންނެވެ.
ޣައްޒާ މީޑިއާ އޮފީހުން ބުނެފައިވަނީ، މިއީ ހަމަލާތައް ހުއްޓާލުމުގެ އެއްބަސްވުމާ ކަނޑައެޅިގެން ޚިލާފް އަދި އިންސާނިއްޔަތުގެ ގާނޫނާ ފާޅުކަންބޮޑު ގޮތެއްގައި ޚިލާފްވެ އިސްތިއުމާރީ ބާރުން ހިންގަމުން ގެންދާ ޖަރީމާތަކެއް ކަމަށެވެ.
ހަމަލާތައް ހުއްޓާލުމަށް އެއްބަސްވުމެއް ވެވުނަސް އެޔަށް އިސްތިއުމާރީ ބާރުން އަމަލު ނުކުރާނޭކަން މިކަމުން ވަރަށް ސާފުކޮށް ހާމަވާ ކަމަށް، ޣައްޒާ މީޑިއާ އޮފީހުން ނެރުނު ބަޔާނުގައި ބުނެފައި ވެއެވެ.
ކިޔުންތެރިންގެ ހިޔާލު